SİYASƏT
Fransa Ermənistanı geosiyasi maraqlarının girovuna çevirərək regionda sülhə təhdid yaradır - ŞƏRH
![Fransa Ermənistanı geosiyasi maraqlarının girovuna çevirərək regionda sülhə təhdid yaradır - ŞƏRH](/files/2023/3/1200x630/16935755384929033985_1200x630.jpg)
Bakı, 1 sentyabr, AZƏRTAC
Azərbaycan öz suveren torpaqlarında cari ilin aprel ayının 23-də “Laçın” dövlət sərhədindən buraxılış məntəqəsini yaratmaqla beynəlxalq ictimaiyyətə ərazi bütövlüyü məsələsində heç bir güzəştin olmayacağını bəyan etdi. Başda Fransa olmaqla bəzi qüvvələr Azərbaycana təzyiq yolu ilə Laçın yolunun ümumilikdə istisnasız açılmasına çalışdılar, ancaq niyyətlərinin baş tutmadığını görüb “humanitar” şou təşkil etdilər. Fransa Ermənistanı geosiyasi maraqlarının girovuna çevirərək daxildə erməni lobbisinin təsiri altında emosional reaksiyalarla regionda sülhə təhdid yaradır. Bu addım isə daha çox Ermənistanın özünə ziyandır. Biz bunun Vətən müharibəsində şahidi olduq. Belə ki, Ermənistanın acı məğlubiyyətlərini unudub yenidən hansısa xülyalar dünyasında yaşaması reallıqdan kənardır. Ermənistanın siyasi rəhbərliyi qaydalara riayət etmək əvəzinə kimlərinsə maraqlarının daşıyıcısı roluna girmək istəyirsə, nəticə ilə hesablaşmaq məcburiyyətində qalacaq. Düşünülməmiş siyasi addımlar bir çox hallarda dövlətin nəinki maraqlarına zərbə vurur, hətta suverenliyini təhlükə altına salır.
Bu sözləri AZƏRTAC-a açıqlamasında politoloq Tural Əliyev söyləyib.
O qeyd edib ki, Fransa vaxtilə həyata keçirdiyi müstəmləkəçilik siyasətinin əks təsirlərini görməkdədir. Afrika qitəsində nüfuzunu itirən, resurslarını sovurmaqla var-dövlətini artıran Fransanın dünyadakı dayaqları zəifləməyə doğru gedir. Fransa Prezidenti Emmanuel Makron hakimiyyətə gələndən sonra ölkədə tətillərin sayı artıb, dəfələrlə hökumətin islahatlarına qarşı amansız mitinqlər baş tutub. Bütün aksiyalar isə kütləvi iğtişaşlarla yekunlaşıb. Daxili problemləri həll etmək əvəzinə, Fransa hakimiyyəti müxtəlif şəhərlərin merlərini tarixdə onlara heç vaxt aid olmayan Qafqaz regionuna müdaxilə üçün həvəsləndirir. Separatizmi dəstəkləyən bəyanatlar, öz səlahiyyətlərinə aid olmayan vədlər, Azərbaycan hüquq-mühafizə orqanları tərəfindən Birinci Qarabağ müharibəsi zamanı dinc əhaliyə divan tutan terrorçunun ailəsinə tezliklə onun azad olunacağı ilə bağlı şirnikləndirici sözlər vermək bir daha Fransanın beynəlxalq qanunların tərəfində olduğunu deyil, hüquqazidd əməlləri dəstəkləyən bir ölkəyə çevrildiyini isbatlayır.
“Prezident İlham Əliyev fransalı həmkarı ilə telefon danışığında qarşı tərəfə suveren sərhədlərlə bağlı xatırlatma edərək Azərbaycanın haqlı hədəflərindən bir addım belə geri atmayacağını açıq şəkildə ifadə etdi.
Fransa bütün parametrlər üzrə regional maraqların təmin olunmasında uduzur. Görünən odur ki, Ermənistan da öz siyasi məqsədləri naminə itirilmiş nüfuzunu bərpa edəcəyini düşünür. Bu gün Azərbaycanın təklif etdiyi sülh platformasına səs verməklə, bölgəyə barış gələcəyi halda bütün tərəflər siyasi, iqtisadi dividendlər qazanacaq. Fransa daha çox separatizm üçün deyil, reinteqrasiya prosesinin sürətlənməsinə çalışmalıdır. Azərbaycan istənilən halda milli maraqlarından vaz keçməyəcək, bunu nə qədər tez dərk etsələr, bəzi qüvvələr üçün bir o qədər xeyirli olar”, - deyə T.Əliyev bildirib.
O əlavə edib ki, Beynəlxalq Qırmızı Xaç Komitəsi (BQXK) humanitar məqsədlərə xidmət üçün yaradılmasına baxmayaraq, qurum öz öhdəliklərini doğru yerinə yetirmir. Adından da göründüyü kimi, bu təşkilat hansısa dövlətlərin siyasi ruporu olmamalıdır. Təəssüflər olsun ki, bəzi hallarda BQXK öz fəaliyyətindən kənara çıxmaqla, statusuna yaraşmayan birtərəfli bəyanatlar səsləndirir. Birinci Qarabağ müharibəsi zaman 4000-ə yaxın azərbaycanlının itkin düşməsi barədə bu günə qədər Beynəlxalq Qırmızı Xaç Komitəsi Ermənistandan heç bir izahat tələb etməyib. Əksinə istər Birinci, istərsə də İkinci Qarabağ müharibələrində erməni təəssübkeşliyini önə çıxararaq, humanitar sözünü siyasətlə əvəzləyib, bununla da bütövlükdə öz fəaliyyətinə kölgə salıb. Məramnaməsindən irəli gələrək BQXK üçün insan faktoru önəmli olmalıdır, yardıma ehtiyac duyan, faciələrlə üzləşən insanların yanında yer almalıdır. Komitə ədalətin təntənəsinə çalışmalıdır, başqa niyyət və şəxsi maraqlara xidmət quruma başucalığı gətirmir, etibarlılıq nöqteyi-nəzərdən isə fəaliyyətinə şübhə toxumu səpir.