FRANSA SOSİALİSTLƏRİ ERMƏNİPƏRƏST MÖVQELƏRİNDƏN ƏL ÇƏKMİRLƏR
Sosialist patiyasına arxalanan ermənilər onun köməyi sayəsində Milli Assambleyada uydurma “erməni soyqırımı” ilə bağlı yeni bir qanun layihəsinin müzakirəyə çıxarılması üçün ciddi canfəşanlıq göstərir. Yeni qanun layihəsinə görə, kimliyindən asılı olmayaraq, Fransada “erməni soyqırımı”nı inkar edənlərə və onun əleyhinə danışanlara məhkəmə tərəfindən xüsusi cəza tədbirləri tətbiq edilməlidir.
Ermənipərəst sosialistlərin belə bir layihənin ali qanunverici orqanın müzakirəsinə çıxarılmasına cəhd göstərmələri fransız tarixçilərinin ciddi narazılığına səbəb olmuşdur. Bununla bağlı onlar hökumətə və Milli Assambleyaya ünvanlanmış xüsusi bəyannamə qəbul etmişlər.
Ölkənin nüfuzlu Frans Press Agentliyi tarixçilərin bəyanatı ilə əlaqədar məlumat yaymışdır. Həmin məlumatı oxuculara təqdim edirik.
Erməni soyqırımı: sosialistlərin təklifi tarixçiləri
şoka salmışdır
Bu günlərdə bir qrup məşhur tarixçi sosialistlər qrupunun erməni soyqırımı ilə bağlı irəli sürmək istədiyi qanun layihəsinin onları şok vəziyyətinə saldığını bəyan etmişdir.
Ötən ilin dekabr ayında “Tarixə azadlıq” sərlövhəli ərizə ilə hökumətə müraciət etmiş və “yaddaş qanunları”na səsvermənin tam əleyhinə olan tarixçilərin bəyanatında Milli Assambleyanın mayın 18-də keçiriləcək iclasında sosialist partiyasının irəli sürdüyü qanun layihəsinin müzakirə ediləcəyi barədəki xəbərdən dərin şok keçirdikləri xüsusi vurğulanmışdır.
Əgər həmin təklif qəbul edilərsə, bu zaman o, hələ tam təsdiqini tapmamış 1915-ci il erməni soyqırımını tanımış Fransa dövlətinin 2001-ci il 29 yanvar tarixli qərarını tamamlayacaqdır.
Bəyanatda deyilir ki, “biz yaxın vaxtlarda həmin qanuna səs veriləcəyinin və onun demokratik rejimin bir alçaq rəsmi sənədi tək elan ediləcəyinin qəti əleyhinəyik”.
Sosialistlərin müzakirəyə çıxarmaq istədikləri qanuna görə, erməni soyqırımını inkar edənlərə yəhudi soyqırımını inkar edənlər kimi eyni cəza verilməlidir. Tarixçilər bildirirlər ki, məsələnin belə qoyuluşu azadlıq ifadəsinə ağır zərbə olacaq, hadisələrin gedişinə ciddi təsir göstərəcəkdir.
Bəyanatı imzalamış tarixçilər bəyan edirlər ki, Milli Assambleyada qrupların rəhbərləri ilə dekabr ayındakı görüş zamanı onların “yaddaş qanunları”na əsaslanan hər hansı bir yeni qərar qəbul etməyəcəkləri barədə qəti söz vermələri bizi həqiqətən əməlli-başlı arxayın etmişdi.
Məşhur tarixçi Jan-Pyer Azemadan əlavə, “Tarixə azadlıq!” sənədini Elizabet Badinter, Mark Ferro, Jak Cüliyer, Pyer Nora, Mona Ozuf, Jan-Pyer Vernan və Pyer Vidal-Nake kimi tanınmış alimlər imzalamışlar.
Xalq Hərəkatını Dəstəkləmə İttifaqı partiyasının Milli Assambleyasındakı təmsilçisi partiya sədrinin müavini Erik Rault da oxşar qanun layihəsi təklifi etməyi qərara almışdır.
“Tarixə azadlıq!” sənədini imzalamış 400-dən artıq tarixçi keçmiş hadisələrə qiymət verilməsində gündən-günə artan siyasi müdaxilələrdən təşviş hissi keçirdiklərini bildirmişdir. Tarixçilər demokratik rejimin alçaq qanunları barədəki bəzi maddələrin ləğv olunmasını tələb edirlər.
Erməni soyqırımına gəldikdə, Türkiyə soyqırım tezisini tamamilə rədd edir və vətəndaş müharibəsi zamanı Osmanlı imperiyası ərazisini işğal etmiş rus ordusunda ermənilərin vuruşduğunu nəzərə alaraq, hadisənin bu kontekstdə araşdırılmasını istəyir.
Ankara 300 min erməninin qırıldığını və bir o qədər də türkün məhv edildiyini dəfələrlə bəyan etmişdir.
Ermənilər isə deportasiya və qırğınlar zamanı 1,5 milyon erməninin məhv edildiyini iddia edirlər.
Bu yaxınlarda Lionda soyqırımla əlaqədar qoyulmuş abidənin açılışına bir neçə gün qalmış onun üzərində türk və fransız dillərində soyqırımı inkar edən yazılar yazılmışdı.
Bölmənin digər xəbərləri
