GƏNC SUMQAYITLI VOKALÇI BEYNƏLXALQ MUSİQİ FESTİVALINDA UĞUR QAZANMIŞDIR
Sumqayıt, 4 iyul (AZƏRTAC). Sumqayıtdakı Qara Qarayev adına Musiqi Məktəbinin şagirdi Gülzar Fərəcova Türkiyədə keçirilən beynəlxalq musiqi festivalından vətənə gümüş medalla qayıtmışdır.
Gənc müğənni möhtəşəm final konsertindən əvvəl olmuş bütün seçim mərhələlərindən uğurla keçərək, Azərbaycandan olan 5 iştirakçı sırasında musiqi yarışının dünya finalına çıxmışdır. Türkiyənin incəsənət xadimlərindən ibarət münsiflər heyətinin qərarı ilə Gülzar 115 ölkənin nümayəndələrinin qatıldığı VII Beynəlxalq türk olimpiadasına vəsiqə qazanmışdır.
Ankarada, Topqapı salonunda keçirilən konsertdə “Asiyanın qızıl səsi” adına layiq görülmüş G.Fərəcova daha sonra İstanbulda fəxri ikinci yeri tutmuş və olimpiadanın gümüş medalına layiq görülmüşdür.
G.Fərəcova Türkiyənin Kayseri, Adana, Ceyhan şəhərlərində konsert turnesində iştirak etmiş, SHOU TV, TRT, Kanal D, Samanyolu kimi telekanalların efirində çıxış etmişdir.
######
Bölmənin digər xəbərləri
