GƏNCƏ ELM MƏRKƏZİNİN DİREKTORU PROFESSOR FUAD ƏLİYEVİN ÇIXIŞI
Siz qədim Gəncə torpağına xoş gəlmisiniz. Heç də təsadüfi deyil ki, burada 31 oktyabrı xatırlatdınız, Eldar müəllimin adını çəkdiniz. Həmin gün biz də Bakıda Sizin andiçmə mərasiminizdə iştirak edirdik. Bu üç il ərzində Gəncə şəhərində çox böyük dəyişikliklər nəzərə çarpır. Sizə deyə bilərəm ki, Gəncə şəhərində iqtisadi və mədəni sahələrdə çox böyük işlər görülmüşdür. Sizin xeyir-duanızla və Heydər Əliyev Fondunun dəstəyi və köməyi ilə şəhərimizdə xalqımızın qəhrəmanlıq salnaməsində şərəfli yeri olan Cavad xanın məzarı abadlaşdırılmış və burada məqbərə tikilmiş, orta əsrlərin yadigarı olan Comərd Qəssab türbəsi bərpa edilmiş, müstəqil dövlətçiliyimizin memarı və qurucusu olan Heydər Əliyevin muzeyi tikilib başa çatdırılmışdır.
Bundan başqa, şəhərimizdə 20-dək məscid yenidən bərpa olunub və buna görə də biz Heydər Əliyev Fonduna öz minnətdarlığımızı bildiririk.
Möhtərəm Prezident, Sizin təsdiqlədiyiniz regionların sosial-iqtisadi inkişafı Dövlət proqramının Gəncə-Qazax iqtisadi rayonuna dair bölməsi şəhər icra hakimiyyətində geniş müzakirə olunmuş və o vaxtdan Gəncədə böyük quruculuq işləri aparılmışdır. Gəncəmiz dünyanın ən iri şəhərləri kimi avtomobil istehsalına başlamış, şəhərdə yeni toxuculuq kombinatı, asfalt-beton zavodları, yeni şərab zavodu və qeyd etdiyiniz kimi, ən müasir tipli Olimpiya-İdman Kompleksi istifadəyə verilmişdir.
Möhtərəm Prezident, bizə çox gözəl imkan verdiniz ki, şəhərimizdə tarixi bir hadisəni qeyd edək. Bu da bizim Gəncənin 2500 illiyidir. Mən bu münasibətlə, Gəncəmizin 2500 illiyinin keçirilməsi münasibətilə Sizə şəhərimizin ziyalıları, bütün sakinləri adından dərin minnətdarlığımı bildirirəm. Çox sağ olun, möhtərəm Prezident!
Cənab Prezident, bu tarixi hadisə münasibətilə ziyalılarımızın təşəbbüsü ilə “Gəncə-2500” ordeni təsis olunmuşdur. Gəncə ziyalıları öz yığıncaqlarında belə bir yekdil qərara gəldilər ki, 1 nömrəli “Gəncə-2500” ordenini Sizə, xalqımızın ən görkəmli övladına, Gəncənin inkişafında böyük xidmətləri olan möhtərəm Prezidentimizə təqdim edək. Biz ziyalılar öz aramızda Sizi Qurucu Prezident adlandırırıq. Yaşasın İlham Əliyev! Yaşasın Qurucu Prezidentimiz! İcazə verin, Gəncə sakinləri adından bu ordeni Sizə təqdim edək.
X X X
Azərbaycanın tarixinin bütün dövrlərində xüsusi yeri və rolu olan Gəncənin 2500 illiyi şərəfinə təsis edilmiş ordenin birincisi Prezident İlham Əliyevə təqdim olundu.
X X X
Sonra Prezident İlham Əliyev Gəncə beynəlxalq hava limanının rəsmi açılışını bildirən lenti kəsdi, qədim şəhərin yeni hava qapısının aerovağzal binası, burada quraşdırılan müasir avadanlıqla tanış oldu.
Dövlət Konserninin baş direktoru Cahangir Əsgərov viza bürosu, yükün qəbulu və göndərilməsi, pasport-nəzarət şöbəsi, sərnişinlərin gözləmə salonu, gələn sərnişinlərin qəbulu, bilet satışı, baqajın alınması və digər bölmələrin fəaliyyəti barədə məlumat verdi.
Video-müşahidə otağına gələn dövlətimizin başçısına məlumat verildi ki, burada quraşdırılan müasir kompyuter və müşahidə aparatları vasitəsilə bütün şöbələrə, büro və məntəqələrə nəzarət etmək mümkündür.
Meteoroloji təminat şöbəsinin işi ilə tanışlıq da maraq doğurdu. Şöbə uçuşların meteoroloji cəhətdən təhlükəsizliyini təmin edir, kompleks avtomatlaşdırılmış stansiya vasitəsilə meteoroloji elementlər üzərində müşahidələr aparır, hava limanına enən və buradan qalxan təyyarələr üçün məlumatları lazımi qurumlara çatdırır.
Daha sonra Prezident İlham Əliyev hava limanının uçuşları idarəetmə qülləsinə çıxdı və buradan qədim Gəncənin mənzərəsini seyr etdi.
Bölmənin digər xəbərləri
