GƏNCƏ ŞƏHƏR İCRA HAKİMİYYƏTİNİN BAŞÇISI ELDAR ƏZİZOVUN ÇIXIŞI
Hörmətli mərasim iştirakçıları,
Bu gün bizim sevincimizin həddi-hüdudu yoxdur. Ona görə yox ki, yeni hava limanı açılıb, ilk növbədə, ona görə ki, biz bu gün cənab Prezidentin üç illik hakimiyyəti dövründə beşinci, yubiley xarakterli səfərini yaşayırıq. Üç ildə beş səfər! Bu, bizim üçün böyük şərəfdir və hər belə gəliş yeni sıçrayışla nəticələnir.
Mən deyərdim ki, dahi Heydər Əliyevin “Gəncə hər bir vətənpərvər azərbaycanlı üçün doğmadır, əzizdir” sözlərini cənab İlham Əliyev öz işi ilə birmənalı təsdiq edir. Məhz onun siyasəti nəticəsində Gəncə bu gün qurulur, yeniləşir və öz tarixi yaddaşını bərpa edir.
Möhtərəm cənab Prezident!
İcazə verin, şəhərə olan diqqət və qayğıya, məhəbbətə görə Sizə və qədim Gəncənin tarixi yaddaşının bərpasında göstərdiyi köməyə görə böyük ziyalı Mehriban xanım Əliyevaya qədirbilən gəncəlilərin dərin minnətdarlığını bildirim.
Əziz gəncəlilər, bu gün biz tarixi bir gün yaşayırıq. Yeni və bütün müasir tələblərə cavab verən hava limanı açılır. Mən deyərdim ki, bu hava limanının açılışı artıq Gəncənin gələcək inkişafından xəbər verir. Yeni hava limanının açılması şəhərimizin və şübhəsiz, bütün regionun inkişafına böyük təkan verəcəkdir. Biz artıq bunu hiss edirik.
Son ilyarım ərzində Gəncə əhalisinin sayı 30 faiz artmışdır. Bu böyük sıçrayışdır və ilk növbədə, cənab Prezidentin regional siyasətinin nəticəsi kimi qəbul olunur. Məhz bu siyasətin nəticəsində bütün Azərbaycan kimi, Gəncə də indi yüksək inkişaf sürəti nümayiş etdirir. Gəncə yeniləşir və bu gün birmənalı deyə bilərik ki, Prezidentimizin səyləri sayəsində yeni mərhələyə çıxmışdır. Məhz bu böyük insanın səyləri nəticəsində şəhərimizdə islahatlar gedir.
Bu gün biz bir əlamətdar günü də yaşayırıq. Düz üç il bundan öncə oktyabrın 31-də möhtərəm Prezidentimizin andiçmə mərasimi olmuşdur. Ötən üç ili təhlil edəndə görürsən ki, bu illərin hər biri görülən işlərə, öz əhəmiyyətinə görə bir neçə ilə bərabərdir. Fikir verin, son üç il ərzində yüzlərlə orta məktəb, xəstəxana tikilib, tarixi abidə əsaslı şəkildə bərpa olunub, əksəriyyəti də yenidən ucaldılıbdır. Bu proses davam edir. Mən bir tarixçi kimi demək istəyirəm, illər, əsrlər keçəcək və gələcək nəsillərin tarixçiləri bu dövrü - İlham Əliyevin hakimiyyətdə olduğu dövrü quruculuq və inkişaf dövrü adlandıracaqlar. Qurucu İlham dövrü kimi adlandıracaqlar!
Möhtərəm cənab Prezident!
Fürsətdən istifadə edib, bütün görülən işlərə görə Sizə, görkəmli ziyalı Mehriban xanım Əliyevaya qədirbilən Gəncə sakinləri adından bir daha dərin minnətdarlığımı bildirim, Sizə yeni uğurlar, yeni qələbələr arzulayım.
Bölmənin digər xəbərləri
