Gəncədə “Heydər Əliyev məktəbi” layihəsi start götürüb

19.05.2026 [18:02]
Çap et
A⁺ A^-

Gəncə, 19 may, AZƏRTAC

Yeni Azərbaycan Partiyası (YAP) Gəncə şəhər təşkilatında Ulu Öndər, Yeni Azərbaycan Partiyasının yaradıcısı Heydər Əliyev irsinin dərindən öyrənilməsi və təbliği məqsədi ilə təşkil olunan “Heydər Əliyev məktəbi” adlı layihəyə start verilib.

AZƏRTAC-ın bölgə müxbiri xəbər verir ki, 10 seminardan ibarət olacaq “Heydər Əliyev məktəbi” adlı layihənin ilk seminarı Gəncə Şəhər İcra Hakimiyyəti başçısının müavini Adil Tağıyev tərəfindən keçirilib. “Heydər Əliyev və dövlət idarəçiliyi sistemi” mövzusunda çıxış edən Adil Tağıyev bildirib ki, Azərbaycanda demokratik prinsiplərə söykənən, milli maraqların təmin olunmasına yönəldilmiş, sosial ədalətin təmin olunmasını əsas tutan dövlət idarəetmə sisteminin əsası Ümummilli Lider Heydər Əliyev tərəfindən qoyulub. Ulu Öndər Heydər Əliyevin ali siyasi hakimiyyətə gəlməsi ilə səmərəli dövlət idarəçiliyinin bütün zəruri əsaslarının formalaşdırılmasına xidmət edəcək təsirli addımlar atılıb. Bu mənada dövlət idarəçiliyinin normativ-hüquqi bazasının yaradılması səmərəli islahatların baza prinsipi kimi nəzərdə tutulurdu. Dövlətçiliyin möhkəmləndirilməsi və davamlı inkişafın təmin olunması dövlət idarəçiliyində sistemli şəkildə islahatların həyata keçirilməsini tələb edirdi. Heydər Əliyev tarixi reallıqdan çıxış edərək, dövlət idarəçiliyi sistemində inzibati islahatların həyata keçirilməsini daim diqqətində saxlayıb.

Yeni Azərbaycan Partiyası İdarə Heyətinin üzvü, YAP Gəncə şəhər təşkilatının sədri Bayram Aslanov “Heydər Əliyev və Yeni Azərbaycan Partiyası” mövzusunda çıxış edərək bildirib ki, Ulu Öndər tərəfindən yaradılan YAP fəaliyyəti ilə ölkəmizin, xalqımızın həyatında mühüm rol oynayıb, dövlətçilik tariximizdə yeni mərhələnin əsasını qoyub.

Layihədə dinləyici qismində Gəncə Dövlət Universiteti, Azərbaycan Texnologiya Universiteti, Azərbaycan Dövlət Aqrar Universiteti, Gəncə Tibb Kolleci, Gəncə Regional Kolleci, Gəncə “ASAN xidmət” Mərkəzi, Gəncə Dövlət Peşə Təhsil Mərkəzi və Gəncə-Daşkəsən Regional Təhsil İdarəsinin gənc əməkdaşları olmaqla, ümumilikdə, 40 nəfər iştirak edir. Beş gün ərzində davam edəcək “Heydər Əliyev məktəbi” adlı layihədə deputatlar, universitet rektorları və idarə rəhbərləri iştirakçılarla görüşüb, müxtəlif mövzularda seminarlar keçəcəklər.

Sonda iştirakçılara sertifikatlar təqdim olunacaq.

_{Müxbir - Elcan Məmmədov}