Bakı, 7 may, AZƏRTAC 

Gənclər və İdman Nazirliyinin mətbuat xidmətinin rəhbəri Səmayə Məmmədova karantin rejimi dövründə gənclərin daha aktiv olmaları üçün nazirliyin həyata keçirdiyi layihələr, gənclərin bu dövrdə fəallığı ilə bağlı AZƏRTAC-ın suallarını cavablandırıb.

- Karantin dövründə gəncləri nə qədər fəal saymaq olar? Gənclər və İdman Nazirliyi bu dövrdə gənclərin fəallığının artırılması üçün hansı layihələri həyata keçirib?

- Gənclər haqqında danışarkən göz önünə fərqli və bir-birindən maraqlı sahələr gəlir. Gənclər hər bir sahədə fəaliyyət göstərirlər. Demək olar ki, hər bir sahədə yenilik, yaradıcılıq var. Koronavirus (COVID-19) pandemiyası ilə əlaqədar ölkədə elan olunan karantin rejimi müddətində gənclərimiz Prezident İlham Əliyevin çağırışına cavab olaraq pandemiya ilə mübarizədə dövlət tərəfindən atılan bütün zəruri addımlara, xüsusilə qayğıya ehtiyacı olan insanlara sosial xidmətlərin göstərilməsinə töhfə verməyə çalışıblar. İstər Gənclər və İdman Nazirliyini, istərsə də gəncləri bu karantin müddətində kifayət qədər fəal saymaq olar. Nazirlik ictimai-siyasi, vətənpərvərlik, yaradıcılıq, gənclər təşkilatları ilə iş və digər sahələrdə müxtəlif layihələri onlayn qaydada gerçəkləşdirdi. Əvvəlcə ictimai-siyasi fəal gənclər üçün atılan addımlardan, “Heydər Əliyev siyasi məktəbini öyrənirik” gənc liderlər proqramı haqqında məlumat vermək istərdim. Proqramın əsas məqsədi gənclərdə müstəqil dövlətçilik ənənələrinə hörmət və sədaqət hissinin gücləndirilməsi ilə onlarda liderlik keyfiyyətlərinin inkişafına şərait yaratmaqdır. Burada müəyyən tələblər irəli sürülmüşdü. Gəncin ümummilli lider Heydər Əliyevin həyat və fəaliyyəti barədə məlumatlı olması əsas məqamlardan biridir. Eyni zamanda, gəncin 18-25 yaşlarında, ictimai fəal, geniş dünya görüşlü olmasıdır. Onun ünsiyyət və əlaqə qurmaq, komanda ilə iş, təşkilatçılıq bacarığı da əsas meyarlardan idi. Bu günədək 4 mindən çox gənc bu layihəyə maraq göstərib. 350-dən çox gənc artıq müraciət edib.

- Bəs gənclərin ümumi şəkildə bir araya gəlməsi, müzakirələr aparmaları üçün hansı işlər görülür?

- Gənclər və İdman Nazirliyi tərəfindən keçirilən layihələrin hər birinin gənclərin inkişafı və gələcəyinə yönəlik olduğunu nəzərə alsaq, deməliyik ki, bu dövrdə gənclərlə sıx əməkdaşlıq, onların müzakirələrdə fəallığı, maraqları bizim üçün çox önəmli idi. Nazirlik tərəfindən “Dünya və gənclər yeni şəraitdə” mövzusunda gənclərin ilk onlayn forumunu keçirməklə bir ilkə imza atıldı. Gənclərin qatıldığı bu forumda Milli Məclisin deputatları, nazir müavini İntiqam Babayev, Gənclər Fondunun nümayəndəsi, Gənclər üçün Prezident mükafatı laureatları, eləcə də 130-dan çox QHT-nin nümayəndələri, Qarabağ qaziləri, gənc alimlər, tədqiqatçılar iştirak ediblər. Forumda hazırkı vəziyyətdə və postpandemiya dövründə fəaliyyət, gənclərin yeni şəraitdə bilik və kompetensiyaları, fərdi inkişaf yolları, qeyri-formal təhsilin gücləndirilməsi, gənc nəslin ölkə iqtisadiyyatında və cəmiyyətin inkişafında iştirakı, fərdi potensialın artırılması, birgə fəaliyyətlərin gücləndirilməsi yolları, dördüncü sənaye inqilabı və 5.0 cəmiyyətində gənclərin rolu, eləcə də müstəqil dövlətlərin artan dəyəri şəraitində beynəlxalq əməkdaşlıq məsələləri barədə məsələlərə toxunulub.

Lider, müstəqil dövlətçilik ənənələrinə sadiq gənclərimizdə vətənpərvərlik hissinin, xalqına, millətinə sevginin dərinliyi hər şeydən üstün olmalıdır. Bu səbəbdən nazirlik hər zaman olduğu kimi, bu dövrdə də vətənpərvərlik layihələrinə xüsusi diqqət ayırıb. Bu layihələr sırasında “Mənim qəhrəmanım” layihəsi haqqında danışmaq istərdim. Aprelin 26-dan başlamış və iyunun 26-dək davam edəcək aksiyaya hər bir gənc qoşula bilər. Sadəcə gənclər Azərbaycanın ərazi bütövlüyü uğrunda gedən döyüşlərdə şəhid olmuş və şücaət göstərmiş, eləcə də İkinci Dünya müharibəsinin iştirakçısı olan doğmalarının timsalında qəhrəmanlar haqqında qısa məlumatı şəkillə birlikdə sosial şəbəkələrdə paylaşmalıdırlar. “O mənim qəhrəmanımdır” sözləri ilə yekunlaşan məlumat bu qəhrəmanı hər kəsə tanıdacaq. “Facebook”da “Mənim qəhrəmanım” səhifəsinin 2500-ə yaxın üzvü var. Artıq 1500-dən çox qəhrəman haqqında foto, video məlumatlar yer alıb. Sevindirici haldır ki, bu günədək 30 mindən çox rəy var. Daha çox foto və info Qarabağ savaşının qəhrəmanları ilə bağlıdır. Maraqlı fikir mübadilələrinin aparılması gənclərin vətənpərvərlik hisslərinin daha da inkişafına gətirib çıxarır.

Bununla yanaşı, artıq neçə illərdir ki, nazirlik tərəfindən dəstəklənən “Virtual Qarabağ” layihəsi də vətənpərvərlik mövzusunda maraqlı layihələrdəndir. Bu il Azərbaycanlıların Soyqırımı Gününün ildönümü ilə əlaqədar “Virtual Qarabağ” İnformasiya-Kommunikasiya Texnologiyaları Gənclər İctimai Birliyi tərəfindən gənclərin online fəaliyyəti təşkil edilib. Bu fəaliyyətlər çərçivəsində altı dildə sosial şəbəkələrdə #Genocide, #Genocide102 və #31marchgenocide həştəqləri istifadə olunmaqla gənclər tərəfindən kütləvi paylaşımlar edilib. Bundan başqa, hazırlanmış poster, infoqram, elektron poster, örtük və çərçivə şəkilləri “Twitter”, “Facebook” və “Instagram” sosial şəbəkələrində paylaşılıb. Nəticədə 330 məlumat paylaşılıb və bu məlumatlar 72 min 267 nəfərə çatıb. www.virtualkarabakh.az/com/net /info/org/co.uk veb-səhifəsinə 980 min 989 ümumi baxış, 42 min 329 unikal istifadəçinin daxil olması qeydə alınıb. Veb-səhifəyə daxil olan insanların sayına görə ilk onluqda Azərbaycan, Türkiyə, ABŞ, Çin, Avropa Birliyi, Rusiya, Kanada, Almaniya, Ukrayna, Küveyt, Böyük Britaniya qərarlaşıb. Qeyd edilən dövrdə İctimai Birliyin “virtualkarabakhtv” adlı “YouTube” kanalına 156 yeni abunə olub, 12 min 20 baxış sayı qeydə alınıb. Kampaniya çərçivəsində paylaşımlar edilərək 2100-dən çox “Twitter” istifadəçisinin, 500-dən çox “Instagram” izləyicisinin diqqətinə çatdırılıb.

- Maraqlıdır, nazirliyin layihələrində fəal iştirak edən gənclərin gələcəkdə daha sıx fəaliyyəti üçün hər hansı bir bazası yaradılırmı?

- Gənclərlə iş sahəsi barədə danışarkən mütləq şəkildə gələcək əməkdaşlıq üçün fəaliyyət bazasına xüsusi diqqət ayrılmalıdır. Bu səbəbdən təlimçilər bazası yaradılır. İş Gənclər və İdman Nazirliyinin, Azərbaycan Gənclər Fondunun və Gənclər Təşkilatları Milli Şurasının birgə tərəfdaşlığı ilə gənclərlə iş sahəsində təlimçilər bazası formalaşdırılır.

Əsas məqsəd gənclər siyasəti sahəsində qeyri-formal təhsil imkanlarının keyfiyyətinin artırılması üçün peşəkar təlimçilərdən ibarət vahid və davamlı bazanın yaradılmasıdır. Layihə çərçivəsində gənclərlə iş sahəsində təlimçilərin hazırlanması mexanizminin təkmilləşdirilməsi, onların statusunun müəyyənləşdirilməsi, sertifikasiya mexanizminin, elektron məlumat bazasının yaradılması və reyestrinin aparılması və www.e-telimci.az elektron resursunun yaradılması nəzərdə tutulub. Hazırlıq işləri mart ayında başlayıb. Bu resursun iyunun sonunadək tam təhvil verilməsi planlaşdırılır.

- Bir az da yaradıcılığa, elmə meyilli olan gənclərdən danışaq.

- Burada təbii ki, “Tələbə baharı”, “İdeya var”, “Evdə addımla” və digər layihələr haqqında söz açmaq olar. İstərdim “Bənzət, baxım!” layihəsi haqqında məlumat verim. Yeni və bütövlüklə onlayn keçiriləcək layihənin digər bir üstünlüyü ondadır ki, indiki karantin dövründə gənclər digər ailə üzvlərini də bu fəaliyyətə qata və ya onların dəstəyindən istifadə edə bilərlər. Şüarı “Yarat, öyrən, qazan!” olan layihənin əsas məqsədi gənclərin diqqət və marağını dünya incəsənəti sahəsinə yönəltməklə yanaşı, eyni zamanda, onların özlərinin yaradıcılıq potensialını inkişaf etdirmələri üçün də gözəl imkan olacaq. Onlayn müsabiqə gənclər arasında son zamanlar dəbdə olan kospley yaradıcılığına əsaslanır. Amma bu layihə daha böyük yaradıcılıq və “ixtiraçılıq” tələb edir. Mayın 7-ə müsabiqə ilə 5638 nəfər əhatə edilib, 11 mindən artıq baxış sayı var. Artıq ölkənin müxtəlif şəhər və rayonlarından 30-a yaxın iş daxil olub. Müsabiqə mayın 12-dək davam edəcək.

- Karantin dövründə gənclərin bir çoxu gərgin olublar. Onlara psixoloji dəstəyin göstərilməsi üçün nazirlik hansısa işləri gördümü?

- Tamamilə razıyam. Əfsuslar olsun ki, karantin müddətində bəzi gənclər psixoloji gərginlik yaşadılar. Bununla əlaqədar Gənclər və İdman Nazirliyinin dəstəyi ilə “Gənclər üçün krizis” telefon xətti fəaliyyətini bərpa edib. Artiq 14 ildir ki, bu sahədə təcrübəsi olan krizis telefon xətti psixoloji böhran, ailə münasibətlərində gərginlik, depressiya, qorxu hissi yaşayan hər kəs üçün yardımçı olur. Pulsuz olaraq fəaliyyət göstərəcək bu xidmətə (012 510-66-36) edilən hər bir zəngin anonimliyi qorunacaq. Zənglər həftə içi (bazar ertəsi-şənbə günləri ) saat 10:00-dan 17:00-dək qəbul edilir.