“GƏNCLƏR QLOBALLAŞAN DÜNYADA” MÖVZUSUNDA BEYNƏLXALQ KONFRANS
Konfrans iştirakçılarının bir qrupu Fəxri xiyabana gələrək, müasir Azərbaycan dövlətinin memarı və qurucusu, dahi siyasi xadim Heydər Əliyevin xatirəsini ehtiramla yad etmiş, abidəsi önünə əklil və gül-çiçək dəstələri qoymuşlar.
İştirakçılar ulu öndər Heydər Əliyevin tədbirin keçirildiyi tədris ocağının foyesindəki büstü önünə də gül-çiçək dəstələri düzmüşlər.
Səbail Rayon İcra Hakimiyyətinin başçısı Sahib Ələkbərov, gənclər və idman nazirinin müavini İntiqam Babayev, Milli Məclisin deputatı Aydın Mirzəzadə, ADİU-nun rektoru, Milli Məclisin elm və təhsil məsələləri daimi komissiyasının sədri Şəmsəddin Hacıyev gənclərin inkişafı ilə bağlı problemlərin dövlətin və cəmiyyətin həmişə diqqət mərkəzində olduğunu vurğulamışdır. Bildirilmişdir ki, konfransdan məqsəd gənclərin inkişafı yolunda meydana çıxan problemlər və onların həlli istiqamətində görüləcək işlər, dünyada aparılan islahatlar, qloballaşma və inteqrasiya kimi proseslər haqqında müzakirələr, fikir mübadiləsi aparmaqdır. Qeyd edilmişdir ki, konfrans BMT-nin Minilliyin İnkişaf Proqramı çərçivəsində keçirilir, tədbirin materialları beynəlxalq təşkilatın saytında yerləşdiriləcək və dünyanın əksər ölkələrində bu işlərlə maraqlananlar gənclərin çıxışları ilə tanış olacaq, fikirlərini onlarla bölüşə biləcəklər. Natiqlər müstəqillik əldə etdikdən sonra ümummilli lider Heydər Əliyevin və onun siyasi xəttini əzmlə həyata keçirən Prezident İlham Əliyevin ölkəmizdə bu məsələlərin həlli istiqamətində gördüyü işləri, qəbul edilən sənədləri, dövlətin təhsilin inkişafına göstərdiyi diqqət və qayğını faktlarla vurğulamışlar. Heydər Əliyev Fondunun prezidenti, Milli Məclisin deputatı, YUNESKO-nun xoşməramlı səfiri Mehriban xanım Əliyevanın təşəbbüsü ilə keçən il “Yeniləşən Azərbaycana yeni məktəb” Proqramı çərçivəsində 132 orta məktəbin tikildiyi qeyd edilmişdir.
Tədbirdə tələbələr gəncliyi narahat edən problemlər və onların həlli, gənc nəslin üzərinə düşən vəzifələr haqqında fikir mübadiləsi aparmış, təkliflərini vermişlər.
Konfransda ümummilli lider Heydər Əliyevin gənclərlə görüşləri əsasında hazırlanmış film göstərilmiş, BMT-nin baş katibi Kofi Annanın dünya gənclərinə müraciətinin mətni oxunmuşdur.
Tədbirdən sonra konsertt olmuşdur. Konfrans aprelin 30-da işini davam etdirəcəkdir.
