GÖRKƏMLİ BƏSTƏKARIN 85 İLLİYİ QEYD OLUNMUŞDUR
Noyabrın 7-də “Nizami” kinoteatrında görkəmli Azərbaycan bəstəkarı Tofiq Quliyevin 85 illiyinə həsr olunmuş mərasim keçirilmişdir.
Mədəniyyət Nazirliyinin Kino işləri baş idarəsi rəisinin müavini Fikrət Babayev tədbiri açaraq, Tofiq Quliyevin Azərbaycan musiqi mədəniyyətinin inkişafındakı əvəzsiz xidmətlərindən danışdı, xüsusilə onun kino musiqisinin səciyyəvi cəhətlərini vurğuladı, 20-dən çox filmə musiqi yazdığını bildirdı.
Xalq artisti Ramiz Məlikov, Dövlət Film Fondunun direktor müavini, kinoşünas Aydın Kazımov, xalq artisti Xuraman Qasımova, Bəstəkarlar İttifaqının katibi, professor Ramiz Zöhrabov, xalq artisti Muxtar Maniyev, bəstəkar, xalq artisti Tofiq Bakıxanov və başqaları çıxış edərək Tofiq Quliyevin zəngin və təkrarsız, ecazkar musiqi sənətindən, o cümlədən kino, estrada, operetta musiqisindən, onun yaradıcılığından respublikamızdan kənarda böyük şöhrət qazanmasından söhbət açdılar. Natiqlər görkəmli sənətkarla bağlı xatirələrini də söylədilər, onun gənc musiqiçilərimizə layiqli örnək olduğunu vurğuladılar.
Tədbirin sonunda Tofiq Quliyevin musiqi bəstələdiyi “O qızı tapın” filmi nümayiş etdirildi.
Bölmənin digər xəbərləri
