GÖRKƏMLİ ŞƏRQŞÜNAS ALİM AİDA İMANQULİYEVANIN XATİRƏSİNİ ANMA MƏRASİMİ KEÇİRİLMİŞDİR
AZƏRTAC xəbər verir ki, oktyabrın 10-da Bakı Dövlət Universitetində (BDU) görkəmli şərqşünas alim, filologiya elmləri doktoru, elm təşkilatçısı, professor Aida xanım İmanquliyevanın xatirəsini anma mərasimi keçirilmişdir.
Salonda alimin həyat və fəaliyyətini, elmi yaradıcılığını əks etdirən kitab sərgisi təşkil olunmuşdur.
Tanınmış alimlərin, təhsil işçilərinin, tələbələrin iştirak etdikləri tədbirdə BDU-nun rektoru, Milli Məclisin deputatı, akademik Abel Məhərrəmov çıxış edərək, professor Aida İmanquliyevanın mənalı və şərəfli ömür yolundan, şərqşünaslıq elmimizin inkişafındakı müstəsna xidmətlərindən danışmışdır. Rektor görkəmli şərqşünas alimin həyat və yaradıcılığından danışarkən bildirmişdir ki, Aida Nəsir qızı İmanquliyeva 1939-cu ildə Bakı şəhərində, ziyalı ailəsində anadan olmuşdur. Atası görkəmli jurnalist, pedaqoq, əməkdar elm xadimi Nəsir İmanquliyev XX əsr müasir Azərbaycan mətbuatının təməlini qoyanlardan biri olmuşdur. Anası Gövhər İmanquliyeva (Sultanzadə) Şamaxıda əsilzadə ailəsində dünyaya gəlmişdir.
Aida İmanquliyeva 1957-ci ildə Bakı şəhərinin 132 nömrəli orta məktəbini qızıl medalla bitirmişdir. 1957-ci ildə Azərbaycan Dövlət Universitetinə (indiki BDU) daxil olmuşdur. 1962-ci ildə universitetin şərqşünaslıq fakültəsinin ərəb filologiyası bölməsini bitirdikdən sonra bu ali məktəbin Yaxın Şərq xalqları ədəbiyyatı tarixi kafedrasının aspirantı olmuş, daha sonra keçmiş SSRİ EA Asiya Xalqları İnstitutunun aspiranturasında təhsil almışdır. 
Aida İmanquliyeva 1966-cı ildə namizədlik, 1989-cu ildə isə doktorluq dissertasiyası müdafiə etmiş, professor elmi adına layiq görülmüşdür. O, ilk azərbaycanlı qadın-şərqşünas elmlər doktoru idi. 1991-ci ildən ömrünün sonunadək Azərbaycan Milli Elmlər Akademiyası Şərqşünaslıq İnstitutunun direktoru olmuşdur.
Professor Aida İmanquliyeva Azərbaycan şərqşünaslıq elminə dəyərli töhfələr vermiş, yüksək ixtisaslı kadrların hazırlanmasında mühüm xidmətlər göstərmişdir.
Alimin elmi yaradıcılığından bəhs edən tanınmış şərqşünas, ilahiyyatçı alim, akademik Vasim Məmmədəliyev diqqətə çatdırmışdır ki, professor Aida İmanquliyeva zəngin ənənələrə malik olan Azərbaycan şərqşünaslığının ən görkəmli və ən parlaq nümayəndələrindən biridir. Onu təkcə Azərbaycanda deyil, bir çox xarici ölkələrdə də nüfuzlu və istedadlı alim kimi tanıyırlar. Aida İmanquliyevanın elmi araşdırmalarının zirvəsi olan “Yeni ərəb ədəbiyyatı korifeyləri” monoqrafiyası keçmiş ittifaq, o cümlədən Azərbaycan şərqşünaslığında mühüm hadisə olmuşdur.
Alimin ərəb ədəbiyyatına dair məqalələri, beynəlxalq elmi konfrans və simpoziumlardakı çıxışları yeni ərəb ədəbiyyatının daha dərindən öyrənilməsi üçün ən gözəl mənbələrdən biridir. Bütün bilik və bacarığını Azərbaycan elminin tərəqqisinə həsr etmiş, üç sanballı monoqrafiyanın, 70-dən artıq elmi məqalənin müəllifi olan Aida xanım İmanquliyeva şərqşünaslıq elmimizi müxtəlif nüfuzlu beynəlxalq tədbirlərdə ləyaqətlə təmsil etmişdir.
Akademik V.Məmmədəliyev qeyd etmişdir ki, professor A. İmanquliyeva ərəb mühacir ədəbiyyatının beynəlxalq miqyasda ən görkəmli tədqiqatçısıdır.
Mühacir ədəbiyyatının əsas xüsusiyyətləri, onun çoxəsrlik ərəb ədəbiyyatı ilə oxşar və fərqli cəhətləri, Avropa ədəbiyyatı ilə əlaqələri, bütövlükdə ərəb ədəbiyyatına gətirdiyi yeniliklər, müasir ərəb ədəbiyyatı üçün açdığı üfüqlər və s. bu kimi ümdə məsələlər Şərq-Qərb sintezində öz doğru-düzgün elmi həllini məhz professor Aida İmanquliyevanın monoqrafik tədqiqatlarında tapmış, onun gəldiyi nəticələr beynəlxalq elmi ictimaiyyət tərəfindən yüksək qiymətləndirilərək dəyərli elmi fikir kimi qəbul edilmişdir.
Aida İmanquliyevanın Türkiyədə nəşr olunmuş “Yeni ərəb ədəbiyyatı korifeyləri” adlı fundamental əsərini türk dilinə tərcümə edən, professor-doktor Mahmud Erol Kılıç görkəmli şərqşünas alimin elmi yaradıcılığının əhəmiyyətini vurğulamışdır.
BDU-nun şərqşünaslıq fakültəsinin dekanı Elxan Əzizov, professor A. İmanquliyevanın tələbə yoldaşları, dosentlər - Nərmin Sultanlı, Malik Qarazadə və digər alimlər professor Aida İmanquliyevanın elmi nailiyyətlərindən, gözəl insani keyfiyyətlərindən bəhs etmiş, onunla bağlı xatirələrini söyləmişlər.
Bölmənin digər xəbərləri
