“GÜLÜSTAN” SARAYINDA RƏSMİ QƏBUL
RUSİYA FEDERAL MƏCLİSİ FEDERASİYA ŞURASININ SƏDRİ SERGEY MİRONOVUN ÇIXIŞI
Hörmətli xanımlar və cənablar!
Hörmətli İlham Heydər oğlu, bu gün Sizin həyatınızda və Azərbaycan xalqının həyatında tarixi bir gündür. Bu gün Siz ən yüksək vəzifənin - Azərbaycan Respublikasının Prezidenti vəzifəsinin icrasına başlayırsınız. Rusiya Federasiyası rəhbərliyinin, bütün Rusiya xalqının adından mən Sizi və bütün Azərbaycan xalqını bu əlamətdar gün münasibətilə ürəkdən təbrik edirəm.
Hörmətli İlham Heydər oğlu! İndi Siz MDB-də ən cavan Prezidentsiniz. Düşünürəm ki, yeni əsrimiz cavan və güclü siyasətçilərin meydana çıxması ilə başlanır və bu, çox simvolikdir. Sizi qarşıda çətin vəzifələr gözləyir. Siz indi bütün Azərbaycan vətəndaşlarının rifahı üçün məsuliyyət daşıyır və özünüz dediyiniz kimi, atanızın düzgün və Azərbaycana müvəffəqiyyət qazandırmış xəttini davam etdirməlisiniz. Yəqin hamı mənimlə razılaşar ki, Heydər Əliyev bütün dünyada məşhur olan görkəmli dövlət xadimidir. Andiçmə mərasimində və indi dediyiniz sözlər göstərir ki, Siz bu siyasəti davam etdirəcəksiniz.
Deməliyəm ki, biz hamımız Sizin hər zaman atanızın yanında olmağınızı xatırlayırıq. Mən 1992-ci ili xatırlayıram. Həmin mürəkkəb dövrdə Siz, sözün həqiqi mənasında, Heydər Əliyevlə çiyin-çiyinə dayanmışdınız. Bu onu göstərir ki, Siz həmişə onun xəttini dəstəkləmisiniz və bundan sonra da həmin xəttə sadiq qalacaqsınız.
Biz şübhə etmirik ki, xalqlarımız arasında mövcud olan dostluq münasibətləri bundan sonra da möhkəmlənəcək və bu münasibətlər Rusiya və Azərbaycan xalqlarının mənafeyi naminə davam edəcəkdir.
Mən bütün Rusiya vətəndaşları adından bu badəni öz taleyini, ümidlərini və arzularını Sizə etibar etmiş Azərbaycan xalqının sağlığına qaldırmağı təklif edirəm.
Sağ olun.
Bölmənin digər xəbərləri
