Tbilisi, 22 dekabr, AZƏRTAC

Ermənistanın sabiq prezidenti Levon Ter-Petrosyanın bu günlərdə partiyanın yığıncağındakı çıxışında və mətbuata verdiyi müsahibələrində Ermənistan iqtidarının siyasətinin iflası, Dağlıq Qarabağ münaqişəsinin həlli ilə bağlı güzəştlər barədə səsləndirdiyi fikirlərə gürcü politoloqlar münasibət bildiriblər. Onların fikrincə Petrosyan Ermənistan üçün həyəcan təbili çalır.

Tarixçi alim, Qafqazın Geotarixi və Geosiyasi Araşdırmaları Beynəlxalq Mərkəzinin prezidenti Quram Marxuliya deyib ki, Petrosyanın Ermənistan hakimiyyətinin çox ciddi səhvlərə yol verməsi barədə fikirlərində həqiqət var: “Ermənistanın bu səhvləri ötən əsrin sonlarında başlayıb. Ermənistan xarici havadarlarının köməyi ilə Azərbaycan torpaqlarını işğal etməklə, müharibəyə başlamaqla bu səhvlərə yol verib. Bununla da, əslində, Ermənistan özünün iflasının əsasını qoyub. Ona görə ki, Azərbaycan torpaqlarını işğal etməklə və müharibəyə başlamaqla Ermənistan özünü rəsmi Bakının bilavasitə iştirakı və təşəbbüsü ilə reallaşdırılan irimiqyaslı, regional layihələrdən kənarda qoydu. Bu gün Ermənistan dövlət kimi yox olmaq təhlükəsi ilə üz-üzədir. Erməni geosiyasətçiləri indi fikirləşirlər ki, bu vəziyyəti necə dəyişsinlər. Ona görə də müxtəlif fikirlər səsləndirirlər”.

Quram Marxuliya bildirib ki, Azərbaycanın son illər siyasi, iqtisadi, hərbi və digər sahələrdə əldə etdiyi uğurlar onun qüdrətini daha da artırır. Bu, həm də onu göstərir ki, Azərbaycan istədiyi vaxtda qısa zaman ərzində nəinki Dağlıq Qarabağı azad edə bilər, hətta Yerevanı da ala bilər. Bununla belə, Azərbaycan xalqı yenə də münaqişənin sülh yolu ilə həllini istəyir. Erməni siyasətçiləri və ictimaiyyəti də bunu yaxşı başa düşürlər. Bu gün Ermənistan siyasətçilərinin, qeyri-hökumət təşkilatları nümayəndələrinin Azərbaycana səfərləri, müxtəlif beynəlxalq tədbirlərdə iştirakları da bunu sübut edir. Onlar müxtəlif yollarla pozulmuş münasibətləri bərpa etmək istəyirlər. Bu, bir daha göstərir ki, Ermənistanda fikirlər, siyasi baxışlar dəyişir. Amma təəssüf ki, işğal olunmuş ərazilərin hansı yolla azad olunacağı hələlik bəlli deyil, bu barədə bir söz demirlər. Ona görə də hələ Ermənistan hakimiyyətinə, ictimaiyyətinə inanmaq olmaz.

Gürcüstanın Terrorizm və Siyasi Zorakılıqları Araşdırmalar Mərkəzinin direktoru, geonews.ge informasiya portalının rəhbəri, politoloq Badri Natçkebiyanın fikrincə, Levon Ter-Petrosyanın çıxışında çox ciddi narahatlıq var. O, Ermənistan hakimiyyətinin bugünkü siyasətinin erməni xalqı üçün daha ciddi fəlakətlər gətirəcəyindən narahatdır. Petrosyan və onun tərəfdaşları fikirləşirlər ki, vəziyyət belə davam etdikcə problemlər də artacaq. Ermənistanda, eləcə də Dağlıq Qarabağın özündə ciddi narazılıqlar, iğtişaşlar yaranacaq və bu da Ermənistanın özü üçün ciddi problemlərə gətirib çıxaracaq.

Ermənilər həm də, görülər ki, Azərbaycan Prezidentinin müdrik və praqmatik siyasəti nəticəsində ölkədə çox sabit şərait yaranıb və ölkə inkişaf edir. Azərbaycanın ABŞ, Avropa, eləcə də Rusiya ilə çox yaxşı münasibətləri var. Petrosyan və onun tərəfdaşları bunu yaxşı başa düşür və ciddi düşünməyə məcburdurlar.

Natçkebiyanın sözlərinə görə, Ermənistan siyasətçiləri bu dövlətin xarici siyasətində dəyişiklik edəcəklər. Qonşu ölkələrlə əlaqələrə, eləcə də Dağlıq Qarabağ münaqişəsi ilə bağlı siyasətə yenidən baxacaqlar və münasibətləri normallaşdırmağa çalışacaqlar.

B.Natçkebiya qeyd edib ki, Ermənistan dövlətinin xarici siyasətdə dəyişiklik etməsi, regionda sülhə razılıq verməsi bütövlükdə Cənubi Qafqazda sülhün bərpasına xidmət edə bilər. Bu dəyişiklik Gürcüstanın da işğal olunmuş ərazilərinin azad olunmasına şərait yaradacaq.

Art-Qalleri televiziyasının rəhbəri, politoloq Tengiz Txilava isə deyib: “Levon Ter-Petrosyan çox gözəl bilir ki, Dağlıq Qarabağ münaqişəsi həll olunmadan Ermənistan inkişaf etməyəcək. Münaqişə isə güzəşt olmadan həll edilə bilməz. Düzdür, əvvəllər o, bunu açıq-aşkar etiraf edə bilmirdi, bəlkə də utanırdı. Amma indi bunu açıq bəyan edir. Bundan da belə qənaətə gələ bilərik ki, Ermənistanın siyasi dairələri də artıq bu fikirdədirlər. Onlar görürlər ki, Ermənistan hakimiyyətinin bugünkü siyasəti gözlənilən nəticəni vermədi. Eyni zamanda, Ermənistanın tərəfdaşları da artıq bunu görürlər və başa düşürlər. Digər tərəfdən də Azərbaycan dövlətinin dəyişməyən, prinsipial siyasi kursu onları belə fikirləşməyə vadar edir. Azərbaycan inkişaf edir, güclü dövlətə çevrilib və hər an torpaqlarını hərbi yolla azad edə bilər. Düşünürəm ki, Ermənistan tərəfinin xarici siyasətdə ciddi dəyişikliklər etməsi, qonşularla dostluq münasibətlərini bərpa etməsi bütövlükdə Cənubi Qafqazın inkişafına imkan yaradacaq”.

Xətayi Əzizov

AZƏRTAC-ın xüsusi müxbiri

Tbilisi