GÜRCÜSTANIN AZƏRBAYCANLA SƏRHƏDDƏ YERLƏŞƏN “MTKVARİ” GÖMRÜK-BURAXILIŞ MƏNTƏQƏSİNİN ƏMƏKDAŞI TUTULMUŞDUR

29.04.2004 [00:07]
Çap et
A⁺ A^-

AZƏRTAC-ın xüsusi müxbiri Tbilisidən xəbər verir ki, Gürcüstan maliyyə polisinin əməkdaşları “Mtkvari” (Kür) gömrük-buraxılış məntəqəsinin əməkdaşı Givi Seturidzeni şübhəli şəxs kimi tutmuşlar.

Maliyyə polisinin əməkdaşları Rustavidəki “Azot” kombinatının ərazisində qaçaq mal yüklənmiş “KamAZ” və “PAZ” markalı avtomobilləri saxlamışlar. Həmin maşınlar Azərbaycan sərhədini “Mtkvari” gömrük məntəqəsindən keçmişdir.

Maliyyə polisi cinayətin iştirakçısı olan Gürcüstan vətəndaşları Vasif Əhmədov, Cavanşir Süleymanov və Əli Mehdiyevi tutmuşdur. Onların ifadələrindən müəyyən olunmuşdur ki, gömrük işçisi Givi Seturidze qabaqcadan razılıq əsasında gömrük rüsumu almadan və maneəsiz olaraq külli miqdarda qaçaqmalı Gürcüstan ərazisinə keçirmişdir.

Givi Seturidze barəsində gömrük qaydasını ciddi surətdə pozduğuna və xidmət səlahiyyətlərindən sui-istifadə etdiyinə görə cinayət işi qaldırılmışdır.