Gürcüstanın Baş naziri ABŞ Prezidentinin müşaviri ilə regiondakı vəziyyəti müzakirə edib
Tbilisi, 21 sentyabr, AZƏRTAC
Gürcüstanın Baş naziri İrakli Qaribaşvili ABŞ Prezidentinin Milli Təhlükəsizlik məsələləri üzrə müşaviri Ceyk Sallivan ilə görüşüb.
AZƏRTAC xəbər verir ki, bu barədə mətbuata Gürcüstanın xarici işlər naziri İlya Darçiaşvili bildirib. Onun sözlərinə görə, görüşdə iki ölkə arasında əməkdaşlığın perspektivləri nəzərdən keçirilib.
Söhbət zamanı iki ölkə arasında mövcud əməkdaşlığın daha da möhkəmləndirilməsinin və dərinləşdirilməsinin vacibliyi qeyd olunub.
Tərəflər, həmçinin regiondakı vəziyyəti müzakirə ediblər. Cənubi Qafqaz regionunda təhlükəsizlik məsələlərinə xüsusi diqqət yetirilib.
İrakli Qaribaşvili ABŞ Prezidentinin müşavirini Gürcüstanın Avropaya inteqrasiyası, hökumətin apardığı islahatlar və atdığı addımlar barədə məlumatlandırıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
