“Helene” qasırğası nəticəsində ölənlərin sayı 200-ə çatıb
Vaşinqton, 4 oktyabr, AZƏRTAC
ABŞ-da hökm sürən “Helene” qasırğası nəticəsində ölənlərin sayı 200 nəfərə çatıb.
AZƏRTAC-ın məlumatına görə, yüzlərlə insandan xəbər alınmadığı üçün xilasedicilər ölənlərin sayının daha da artacağını ehtimal edirlər. Qasırğa ABŞ-ın Şimali Karolina, Cənubi Karolina, Corciya, Florida, Tennessi və Virciniya ştatlarını əhatə edib. 1 milyondan çox insan hələ də elektrik enerjisiz qalıb.
Qeyd edək ki, “Helene” qasırğası sentyabrın 19-da Florida sərhədlərinə çatan zaman küləyin sürəti saatda 225 kilometr olub.
“Helene” qasırğası 2005-ci ildə olan “Katrina” qasırğasından sonra ABŞ-da ən böyük itkilərə səbəb olan qasırğa kimi tarixə düşüb.
Məlahət Nəcəfova
AZƏRTAC-ın xüsusi müxbiri
Vaşinqton
Bölmənin digər xəbərləri
