QAN YADDAŞI
Hər bir Azərbaycan vətəndaşı Xocalı ağrısını qəlbində yaşadır
Bakı, 25 fevral, AZƏRTAC
Azərbaycan Milli Elmlər Akademiyasının (AMEA) Radiasiya Problemləri İnstitutunda (RPİ) Xocalı soyqırımının 25-ci ildönümünə həsr olunmuş anım tədbiri keçirilib.
İnstitutdan AZƏRTAC-a bildiriblər ki, tədbirdə bu elm müəssisəsinin direktoru, professor Oqtay Səmədov ermənilərin zaman-zaman xalqımıza qarşı törətdikləri vəhşiliklərdən danışıb.
Xocalı soyqırımının XX əsrin ən dəhşətli və ən qəddarcasına törədilmiş Xatın, Sonqmi, Xirosima və Naqasaki faciələri ilə eyni səviyyədə durduğu diqqətə çatdırılıb. Qeyd olunub ki, Xocalı faciəsi bizim əbədi və sağalmaz dərdimizdir. Bu ağrını qəlbində hər bir Azərbaycan vətəndaşı yaşadır. Odur ki, hər il fevralın 26-da xalqımız bir nəfər kimi Xocalı soyqırımı qurbanlarının xatirəsini yad edir.
Digər çıxış edənlər də Xocalıda qətlə yetirilmiş insanların xatirəsinin ehtiramla anıldığını bildiriblər.