HEYDƏR ƏLİYEV AZƏRBAYCANDA YAŞAYAN BÜTÜN XALQLARIN LİDERİDİR
AZƏRTAC xəbər verir ki, mayın 1-də Səbail Rayon İcra Hakimiyyəti “Sodrujestvo” Azərbaycan Xalqlarının Respublika Həmrəylik Cəmiyyəti ilə birgə rayonda yaşayan 10-dan çox müxtəlif xalqların nümayəndələrinin iştirakı ilə ulu öndər Heydər Əliyevin 85 illik yubileyinə həsr olunmuş yığıncaq keçirmişdir.
Yığıncaq iştirakçıları əvvəlcə ümummilli lider Heydər Əliyevin rayon icra hakimiyyəti binasının foyesində qoyulmuş büstü önünə gül dəstələri düzmüş, xatirəsini ehtiramla anmışlar.
Səbail Rayon İcra Hakimiyyətinin başçısı Sahib Ələkbərov 1969-cu il iyulun 14-də xalqımızın xilaskar oğlu Heydər Əliyevin hakimiyyətə ilk gəlişi ilə müasir Azərbaycan dövlətinin formalaşmasının başlanğıcının qoyulduğunu, ulu öndər Heydər Əliyevin ölkəmizin mədəni, sosial, iqtisadi inkişafı ilə yanaşı, milli münasibətlərin dostluq, qardaşlıq prinsipləri əsasında davam etdirilməsinə də nail olduğunu diqqətə çatdırmışdır.
S.Ələkbərov milliyyətindən asılı olmayaraq Azərbaycanda yaşayan bütün xalqların həqiqi lideri olmuş, əməlləri ilə onların yaddaşlarında əbədi iz qoymuş ulu öndərin ölkəmizə rəhbərlik etdiyi 34 il müddətində gördüyü işlərdən, respublikada müxtəlif xalqlar arasında qurulmuş dostluq və qardaşlıq münasibətlərindən danışmışdır. Diqqətə çatdırılmışdır ki, ümummilli lider Heydər Əliyev bütün xalqların nümayəndələrinə eyni diqqət və qayğı göstərmişdir.
Yığıncaqda çıxış edən Azərbaycan Rus İcmasının sədri, Milli Məclisin deputatı Mixail Zabelin, “Sodrujestvo” Azərbaycan Xalqlarının Respublika Həmrəylik Cəmiyyətinin sədri Tatyana Kərimova, T.Şevçenko adına Ukrayna İcmasının sədri Aleksandr Zareçnıy, “Samur” Ləzgi Cəmiyyətinin sədri Şair Həsənov, “Tuqan-Tel” Tatar Mədəniyyət Cəmiyyətinin sədri Gülcan Məsoutova, Dağ Yəhudiləri İcmasının sədri Semyon İxiilov, Bakı və Xəzəryanı bölgəsi yeparxiyanın mətbuat katibi, protoierey Konstantin və başqaları iftixar hissi ilə vurğulamışlar ki, əsrlər boyu onlarla millətin nümayəndələri Azərbaycanda sülh və əmin-amanlıq şəraitində yaşayırlar. Suveren, demokratik ölkənin vətəndaşları kimi bütün hüquqlara malik olan bu xalqlar öz mədəniyyətlərini, dillərini və ənənələrini qoruyub inkişaf etdirirlər. Bu, ümummilli lider Heydər Əliyevin müdrik siyasəti sayəsində mümkün olmuşdur. Hazırda bu siyasəti onun layiqli davamçısı Prezident İlham Əliyev uğurla davam etdirir.
Bildirilmişdir ki, 1993-cü ildə xalqın təkidli tələbi ilə yenidən hakimiyyətə qayıdan Heydər Əliyev bir müddət hakimiyyətdə olmuş naşı siyasətçilər tərəfindən qısa zaman kəsiyində uzun illər müxtəlif xalqlar və dövlətlər arasında yaranmış əlaqələrin qırılmasına və münasibətlərin pisləşməsinə səbəb olan siyasətə son qoymuş, Rusiya, Ukrayna, Belarus və bir sıra keçmiş sovet respublikaları, dünyanın digər aparıcı dövlətləri ilə əlaqələrin möhkəmləndirilməsinə, xalqlar arasında dostluq münasibətlərinin bərpasına nail olmuşdur.
Milli azlıqların nümayəndələri demişlər ki, onlar özlərini Azərbaycan Respublikasının bərabərhüquqlu vətəndaşları hesab edirlər. Ölkəmizin, xalqımızın problemləri onları da eyni dərəcədə narahat edir. Respublikamızda milli-dini zəmində diskriminasiya, qarşıdurma, ayrı-seçkilik halları yoxdur. Azərbaycanda milli azlıqların öz məktəb, kitabxana, məscid, kilsə, sinaqoq, teatr, qəzetləri vardır, onlar dövlət strukturlarında, ictimai təşkilatlarda, seçkili orqanlarda təmsil olunurlar. Bütün bunlar üçün, ilk növbədə, ulu öndər Heydər Əliyevə borclu və minnətdardırlar. Məhz dahi şəxsiyyət Heydər Əliyev respublikamıza rəhbərlik etdiyi 34 illik bir dövrdə milli azlıqların problemlərini elə incə, köklü və hərtərəfli şəkildə, nadir formada həll etmişdir ki, hətta bir sıra inkişaf etmiş Avropa ölkələri bu təcrübədən öyrənir və bəhrələnirlər.
Xüsusi vurğulanmışdır ki, Prezident İlham Əliyev ulu öndərimizin kursunu davam etdirərək ölkədə yaşayan bütün xalqların nümayəndələrinin sosial vəziyyətlərinin yaxşılaşdırılması, azsaylı xalqların mədəniyyətlərinin inkişafı üçün böyük işlər görür. Onun uğurlu xarici siyasəti nəticəsində Azərbaycan bir çox yaxın və uzaq dövlətlərlə dostluq münasibətlərini möhkəmləndirmişdir.
Yığıncaqda milli azlıqların nümayəndələri adından ölkədə yaşayan bütün xalqlara müraciət qəbul edilmişdir. Yığıncaq iştirakçıları onları qarşıdan gələn prezident seçkilərində doğma xalqının müstəqil yaşamaq hüququna malik olduğunu bütün dünyaya sübut edən ulu öndərin uzaqgörən siyasətinin layiqli davamçısı, ölkəmizin bu günu və gələcəyi naminə var qüvvəsi ilə çalışan İlham Heydər oğlu Əliyevə səs verməyə çağırmışlar.
Sonda məktəblilərin ifasında ədəbi-bədii kompozisiya göstərilmişdir.
######
Bölmənin digər xəbərləri
