HEYDƏR ƏLİYEV İRSİ GƏNC NƏSİL ÜÇÜN NÜMUNƏVİ HƏYAT MƏKTƏBİDİR
AZƏRTAC xəbər verir ki, mayın 5-də Beynəlxalq Mətbuat Mərkəzində “Milli təhsilin formalaşmasında Heydər Əliyevin rolu” mövzusunda Səbail rayon orta təhsil müəssisələrində başa çatmış inşa müsabiqəsinin qaliblərinin mükafatlandırılması mərasimi keçirilmişdir.
Mərasimdə Səbail Rayon Gənclər və İdman İdarəsinin rəisi Vüqar Mürsəlov ümummilli liderimizin 85 illik yubileyi ərəfəsində Milli Qəhrəman Emin Quliyev adına “Xeyriyyə” İctimai Birliyi ilə birgə təşkil etdikləri müsabiqənin əsas məqsədinin Heydər Əliyev irsinin gənclər tərəfindən öyrənilməsi və təbliği olduğunu bildirmişdir.
Natiq vurğulamışdır ki, böyük həyat təcrübəsi olan Heydər Əliyevin zəngin bioqrafiyası və irsi Azərbaycan xalqı, xüsusilə də gənc nəsil üçün bir örnək və nümunəvi həyat məktəbidir.
“Xeyriyyə” İctimai Birliyinin sədri Səltənət Quliyeva və digər çıxış edənlər vurğulamışlar ki, “Həyatımın qalan hissəsini də xalqıma həsr edəcəyəm” deyən ulu öndərimiz, Azərbaycanın dövlət müstəqilliyinin qorunmasında və möhkəmləndirilməsində titanik fəaliyyət göstərmiş və fundamental uğurlara nail olmuşdur.
Bildirilmişdir ki müasir dövrün tələblərinə cavab verən fəal maarifçilik kursunun həyata keçirilməsi, mütərəqqi yeniliklərin tətbiqi ilə milli təhsil sisteminin inkişafı, bu sahədə özünü göstərən obyektiv problemlərin aradan qaldırılması Azərbaycanın dövlət siyasətinin ayrılmaz tərkib hissəsinə çevrilmişdir.
Sonda müsabiqənin qaliblərinə qiymətli hədiyyələr və diplomlar verilmişdir.
Bölmənin digər xəbərləri
