CƏMİYYƏT
Heydər Əliyev Mərkəzində Azərbaycanda ilk dəfə keçiriləcək “Eco Picture Diary -2013” Beynəlxalq ekoloji layihəsinin təqdimatı olacaqdır
Bakı, 31 oktyabr (AZƏRTAC). Noyabrın 1-dən 15-dək Azərbaycanda ilk dəfə olaraq məktəblilər arasında “Eco Picture Diary- 2013” (“Eko Rəsm Gündəliyi -2013”) Beynəlxalq müsabiqəsi keçiriləcəkdir.
Müsabiqənin milli mərhələsi IDEA (International Dialogue for Environmental Action) - Ətraf Mühitin Mühafizəsi üzrə Beynəlxalq Dialoq kampaniyası tərəfindən UNESCO-nun himayəsi altında, Heydər Əliyev Mərkəzi və Panasonic Marketinq MDB-nin (PMCIS) dəstəyi ilə təşkil olunur.
Azərbaycanın ilk dəfə qoşulduğu bu müsabiqə Bakı və Gəncə şəhərlərini əhatə edəcəkdir.
Müsabiqənin noyabrın 1-də Heydər Əliyev Mərkəzində keçiriləcək təqdimat mərasimində 314 ümumtəhsil məktəbi, noyabrın 2-də Gəncə şəhərində təşkil ediləcək konfransda isə 49 ümumtəhsil məktəbi təmsil olunacaqdır.
Heydər Əliyev Mərkəzindən AZƏRTAC-a bildirmişlər ki, “Eco Picture Diary -2013” müsabiqəsinin məqsədi gənc nəsil arasında ekoloji mədəniyyətin təbliği, flora və faunaya qayğının aşılanmasıdır. Layihə, həmçinin ətraf mühit və insan sağlamlığının qorunması üzrə fəal vətəndaş mövqeyinin formalaşmasına xidmət edir.
Müsabiqədə ümumtəhsil məktəblərinin aşağı (6-11 yaşlar arası) və orta (12-15 yaşlar arası) yaş qruplarını təmsil edən şagirdləri iştirak edə bilərlər. İştirakçılar yarışma üçün hazırlanan xüsusi “Eko Gündəlik”də ekologiyaya dair rəsm və onun ideyasının qısa təsvirini əks etdirməlidirlər. Bu noyabrın 1-dən başlayaraq Bakı və Gəncə şəhərlərinin müəllimləri vasitəsilə paylanacaq “Eko Gündəlik”lər noyabrın 15-dək təhvil verilməlidir. Təqdim edilən “Eko Gündəlik”lər münsiflər heyəti tərəfindən qiymətləndiriləcəkdir.
İDEA, Heydər Əliyev Mərkəzi, Azərbaycan Respublikasının Təhsil, Ekologiya və Təbii Sərvətlər nazirlilikləri, UNESCO, PMCİS, KİV və QHT nümayəndələrindən ibarət münsiflər heyəti final mərhələsinə vəsiqə qazanan 20 iştirakçı arasından bir nəfər milli qalibi müəyyən edəcəkdir.
Müsabiqənin qalibi bu il dekabrın 1-dək elan olunacaqdır. Milli qalibin “Eko Gündəliyi” layihənin beynəlxalq münsiflər heyətinə göndəriləcəkdir. Bütün ölkələrin milli qalibləri arasından seçiləcək 6 ən yaxşı finalçı bu ilin dekabrında Parisdə beynəlxalq müsabiqənin nəticələrinin elan olunması mərasimində iştirak edəcəkdir.
Müsabiqənin şərtləri barədə ətraflı məlumatı İDEA-nın internet səhifəsindən (www.ideacampaign.org) əldə etmək olar.
“Eco Picture Diary 2013” Beynəlxalq müsabiqəsi 2008-ci ildən keçirilir. Ötən il yarışmada 51 ölkədən 300 000 məktəbli iştirak etmişdir.