“HEYDƏR ƏLİYEV VƏ MİLLİ İNCƏSƏNƏTİMİZ” MÖVZUSUNDA ELMİ-NƏZƏRİ KONFRANS KEÇİRİLMİŞDİR
AZƏRTAC xəbər verir ki, ulu öndərimiz Heydər Əliyevin anadan olmasının 85 illik yubileyi münasibətilə Rüstəm Mustafayev adına Azərbaycan Dövlət İncəsənət Muzeyində “Heydər Əliyev və milli incəsənətimiz” mövzusunda elmi-nəzəri konfrans keçirilmişdir.
Konfrans iştirakçıları əvvəlcə muzey əməkdaşlarının təşkil etdikləri “Heydər Əliyev Azərbaycan Dövlət İncəsənət Muzeyində” adlı fotostendə baxmışlar.
Muzeyin direktoru, sənətşünaslıq doktoru, professor İsrafil İsrafilov tədbiri açaraq, Azərbaycan milli incəsənətinin inkişafında ümummilli liderimiz Heydər Əliyevin xidmətlərindən, bu sahədə çalışan sənətkarlara diqqət və qayğısından danışmışdır.
Azərbaycan Milli Elmlər Akademiyasının Memarlıq və İncəsənət İnstitutu direktorunun müavini, sənətşünaslıq doktoru Ertəkin Salamzadə “Heydər Əliyev və milli incəsənətimiz”, sənətşünaslıq doktoru Kübra Əliyeva “Heydər Əliyev obrazı tekstil sənətində”, AMEA-nın müxbir üzvü İnqilab Kərimov “Heydər Əliyev və teatr sənəti”, sənətşünaslıq namizədi, dosent Ülkər Talıbzadə “Heydər Əliyev və musiqi” mövzusunda məruzə etmişlər.
İstər məruzələrdə, istərsə də Rəssamlar İttifaqının sədri, xalq rəssamı Fərhad Xəlilovun, Azərbaycan Dövlət Mədəniyyət və İncəsənət Universitetinin prorektoru, professor Rafiq Sadıqovun və başqalarının çıxışlarında Heydər Əliyevin mədəniyyət və incəsənətimizə göstərdiyi qayğısından ətraflı söz açılmışdır.
Tədbirdə SSRİ xalq rəssamı Tahir Salahovun “Heydər Əliyev” portreti nümayiş etdirilmişdir.
Bölmənin digər xəbərləri
