HİNDİSTAN TAC-MAHALIN UÇMAQ TƏHLÜKƏSİNDƏN NARAHATDIR
Hindistanlı tarixçilər bildirmişlər ki, Tac-Mahalın minarələrinin ilk dəfə 1942-ci ildə müşahidə edilmiş əyilməsi getdikcə artmaqdadır. Tədqiqatçılar bunu abidənin ayrılmaz hissəsi olan Camna çayının sabitləşdirici rolu ilə izah edirlər. Ekspertlərdən biri demişdir: “Əgər Tac-Mahalı gələcək nəsillər üçün saxlamaq istəyiriksə, ilk növbədə, çayı xilas etməliyik”.
Abidənin yerləşdiyi Uttar-Pradeş ştatının hökuməti bu məsələ ilə bağlı tədqiqatlara başlamışdır. Bundan əvvəl alimlər belə bir fikir söyləmişdilər ki, Tac-Mahalın inşa edildiyi ağ mərmər atmosferə atılan sənaye tullantılarının təsirindən aşınır. Ona görə də ətrafdakı onlarca müəssisə bağlanmışdı.
Xatırladaq ki, XVII əsrə aid, beşgünbəzli binadan və yanlardakı 4 minarədən ibarət, əlvan və qiymətli daşlarla bəzədilmiş Tac-Mahalı böyük moğol hökmdarı Cahan şah sevimli xanımı Mümtaz Mahal Banu Bəyimin qəbri üzərində tikdirmiş, sonradan özü də burada dəfn olunmuşdur. Abidəni türk memarı ustad Məhəmməd İsa Əfəndi inşa etmişdir.
Bölmənin digər xəbərləri
