Hindistanda dərman zavodunda güclü yanğında ölən və xəsarət alanlar var VİDEO
Bakı, 9 mart, AZƏRTAC
Hindistanın Mumbay şəhərindəki dərman zavodunda baş verən güclü yanğın nəticəsində 3 nəfər ölüb, 14 nəfər müxtəlif dərəcədə yanıq xəsarəti alıb.
AZƏRTAC Hindistan KİV-lərinə istinadla xəbər verir ki, yanğın martın 8-də gecə 23:30 radələrində "Boysar" sənaye zonasındakı dərman zavodunda bir neçə qazanın ard-arda partlaması nəticəsində yaranıb. Partlayışın gücü bir neçə kilometr məsafədə hiss edilib. Yaranmış güclü yanğın isə 10-12 kilometr radiusda gözlə aydın görünə biləcək səviyyədə olub. Yanğın ətrafdakı analoji zavodlara da yayılıb.
Bildirilir ki, dərhal hadisə yerinə yanğınsöndürən briqadalar və təcili tibbi yardım qüvvələri cəlb olunub.
Polisin ilkin rəyinə əsasən, yanğına səbəb dərman istehsalında istifadə oluna tezalışan kimyəvi maddələrin saxlanması qaydalarının pozulması olub. Hazırda yanğının söndürülməsi prosesi davam edir.
Bölmənin digər xəbərləri
