SİYASƏT
Hüquq elmləri doktoru: Erməni terrorçularının və ekstremistlərinin əməllərinə BMT TŞ-də qiymət verilməlidir
Bakı, 31 avqust, AZƏRTAC
Erməni terrorçuları və ekstremistlərinin əməllərinə BMT Təhlükəsizlik Şurasında qiymət verilməlidir. Bu barədə AZƏRTAC-a hüquq elmləri doktoru, professor, fövqəladə və səlahiyyətli səfir, 2-ci dərəcə dövlət müşaviri Namiq Əliyev erməni mənşəli bir qrup şəxsin Azərbaycanın Livandakı səfirliyinə hücumunu şərh edərkən deyib.
Azərbaycan Xarici İşlər Nazirliyi cümə axşamı bildirdi ki, erməni mənşəli 50 şəxs Azərbaycan Respublikasının Livan Respublikasındakı səfirliyinin önündə aksiya keçirərək diplomatik nümayəndəliyin inzibati binasının hasarlarına zərbələr endirmiş, ona özləri ilə gətirdikləri rəng və partlayıcı maye olan şüşələr atmışdır.
Agentliyin həmsöhbəti qeyd edib: “Siyasi, diplomatik və ya hərbi sahələrdə məğlubiyyətə uğrayanda, beynəlxalq hüquq, beynəlxalq münasibətlərdə ümumi normalar və davranış qaydaları nöqteyi-nəzərindən arqumentləri qalmayanda, dünya erməniləri fəallaşır. Sistemli erməni cinayətləri və təxribatlarında etnik ermənilərin son onilliklər ərzində bütün dünyada, o cümlədən Fransada da törətdikləri silsilə terror aktlarına lazımi qiymət verməyən beynəlxalq ictimaiyyət də təqsirkardır. Bu azmış kimi, terror aktlarının və qətllərin törədilməsində təqsirli bilinən bir neçə nəfər onlara verilmiş cəzadan vaxtından əvvəl azad edilib. Dünya ictimaiyyətinin ermənilərin Azərbaycan səfirliyinə hücumuna belə “diqqətsizliyi” daha ciddi fəsadlara gətirib çıxara bilər. BMT Təhlükəsizlik Şurasında erməni terrorçularının və ekstremistlərinin törətdikləri əməllərə qiymət verilməlidir”.
Bu insidentin Azərbaycanın xaricdəki səfirliklərinə qarşı birinci hücum olmadığını qeyd edən Namiq Əliyev vurğulayıb ki, erməni diasporu cinayətlər törədilməsi ilə müşayiət olunan bu cür təxribatlar təşkil edir və permanent olaraq, onların təkrarlanmayacağını hesab etmək üçün heç bir əsas yoxdur.
O xatırladıb ki, 18 aprel 1961-ci il tarixli diplomatik əlaqələr haqqında Vyana Konvensiyasına uyğun olaraq “qədim vaxtlardan bütün ölkələrin xalqları diplomatik agentlərin statusunu tanıyır”. Həmin Konvensiyanın 22-ci maddəsinə əsasən, nümayəndəlik binaları toxunulmazdır. Nümayəndəliyi hər cür hücumlardan və zərər vurulmasından qorumaq və nümayəndəliyin sakitliyinin pozulmasının və ya şərəfinin təhqir olunmasının qarşısını almaq üçün lazımi tədbirlər görmək yerləşmə dövlətinin xüsusi vəzifəsidir. Vyana Konvensiyasının 29-cu maddəsinə müvafiq olaraq isə, “diplomatik agentin şəxsiyyəti toxunulmazdır. Yerləşmə dövləti ona lazımi hörmətlə yanaşmalı və onun şəxsiyyəti, azadlığı, yaxud şərəfinə istənilən qəsdlərin qarşısını almaq üçün bütün lazımi tədbirləri görməlidir.
Namiq Əliyev əlavə edib: “Səfirliyə, onun əmlakına vurulan zərər bu cinayətin törədilməsində təqsirkar olan şəxslərin tapılmasından asılı olmayaraq, diplomatik nümayəndəliyin yerləşdiyi dövlət tərəfindən kompensasiya edilməlidir”.