İğdır Universitetində Xocalı soyqırımı haqqında film nümayiş etdirilmişdir
Bakı, 26 fevral (AZƏRTAC). Fevralın 26-da Türkiyənin İğdır Universitetində “Xocalı soyqırımını dünyaya tanıdaq” mövzusunda konfrans keçirilmişdir.
Beynəlxalq Diaspor Mərkəzindən (BDM) AZƏRTAC-a bildirmişlər ki, konfransdan əvvəl universitetin foyesində Xocalı soyqırımını əks etdirən fotoşəkillərdən ibarət sərgi nümayiş etdirilmişdir.
Çıxış edən BDM-in sədri İsmayıl Ağayev və “Əsassız erməni iddiaları ilə mübarizə” dərnəyinin (ASİM-DER) rəhbəri Göksel Gülbəy erməni terrorçularının 22 il əvvəl törətdikləri qanlı cinayətin ifşası ilə bağlı Türkiyə və müxtəlif ölkələrdə həyata keçirdikləri tədbirlər barədə ətraflı məlumat vermişlər.
Sonra çıxış edən İğdır Universitetinin rektoru, professor İ. Haqqı Yılmaz, universitetin müəllimi Türkan Qədirzadə və başqaları ermənilərin türk və Azərbaycan xalqlarına qarşı zaman-zaman həyata keçirdikləri qırğınlardan söz açmış, törədilmiş cinayətlərin sübuta yetirilməsi üçün kifayət qədər əsasların olduğunu diqqətə çatdırmışlar.
Qarabağ müharibəsinin iştirakçısı, faciənin canlı şahidi Əlövsət Qasımov Xocalıda həyata keçirilmiş soyqırımı zamanı günahsız insanların başına gətirilən vəhşiliklər barədə danışmışdır.
Tədbirdə Xocalı soyqırımı haqqında sənədli film nümayiş etdirilmiş, plakatlar paylanılmışdır.
Bölmənin digər xəbərləri
