“İgidlik simvolu – İlqar Mirzəyev” adlı anım tədbiri keçirilib
Bakı, 3 may, AZƏRTAC
Mayın 3-də Azərbaycanın Milli Qəhrəmanı İlqar Anzor oğlu Mirzəyevin anadan olmasının 50 illik yubileyinə həsr olunmuş “İgidlik simvolu - İlqar Mirzəyev” adlı anım tədbiri keçirilib.
AZƏRTAC xəbər verir ki, tədbirdə muzey rəisi Əzizağa Qənizadənin məruzəsi, Milli Qəhrəman İlqar Mirzəyevin ailə üzvlərindən anası Gülnarə xanım, oğlu Elvin Mirzəyev, döyüş yoldaşları polkovnik-leytenant Mürşüd Babayev, polkovnik-leytenant Təbriz Kərimov, polkovnik Xəyyam Məmmədov, Qarabağ Müharibə Əlilləri, Veteranlar və Şəhid ailələri Yasamal rayon İctimai Birliyinin mətbuat xidmətinin rəisi Pərvanə Amanova və digərləri çıxış ediblər. Çıxışlarda İlqar Mirzəyevin şərəfli ömür yolu haqqında məlumat verilib.
Bildirilib ki, İlqar Anzor oğlu Mirzəyev 1973-cü il mayın 8-də Gürcüstan Respublikasının Qardabani şəhərində anadan olub, 1980-1990-cı illərdə həmin şəhərdə tam orta məktəbdə təhsil alıb. 1991-ci ildə Bakı Ali Birləşmiş Komandalıq Məktəbinə qəbul olub və 1995-ci ildə oranı "Artilleriya" ixtisası üzrə bitirib.
Tarixə Aprel döyüşləri olaraq yazılan hərbi əməliyyatlar zamanı "N" saylı hərbi hissənin komandiri İlqar Mirzəyev cəbhənin Tərtər rayonu istiqamətində gedən döyüşlərdə savaşıb.
2020-ci il iyulun 12-də Ermənistan silahlı qüvvələrinin bölmələri Azərbaycan-Ermənistan dövlət sərhədinin Tovuz rayonu sahəsində Dövlət Sərhəd Xidmətinin mövqelərini artilleriya qurğularından atəşə tutub, Azərbaycan Ordusunun bölmələrinin cavab tədbirləri görməsi nəticəsində Ermənistan Ordusunun hücum cəhdinin qarşısı alınıb. İyulun 13-dən 14-nə keçən gecə və səhər saatlarında Azərbaycan-Ermənistan dövlət sərhədinin Tovuz rayonu sahəsində şiddətli döyüşlər davam edib. Polkovnik İlqar Mirzəyev 2020-ci il iyulun 14-də səhər saatlarında Tovuz rayonu istiqamətində döyüş zamanı ön xətdə şəhid olub. Həmin an onunla birgə olan 3-cü Ordu Korpusunun Komandir müavini general-mayor Polad Həşimov, mayor Anar Novruzov, mayor Namiq Əhmədov, gizir İlqar Zeynallı, gizir Yaşar Babayev və əsgər Elçin Mustafazadə də şəhid olub.
Azərbaycanın ərazi bütövlüyünün bərpa edilməsində xüsusi xidmətlərinə və döyüş tapşırıqlarını yerinə yetirən zaman göstərdiyi igidliyə görə Prezident İlham Əliyevin 2020-ci il 9 dekabr tarixli Sərəncamına əsasən İlqar Mirzəyevə ölümündən sonra Azərbaycanın Milli Qəhrəmanı adı verilib.
Sonra Milli Qəhrəman polkovnik İlqar Mirzəyevə həsr olunan “İlqarı Vətən - İlqar Mirzəyev” adlı sənədli film nümayiş olunub.
İki mindən artıq şəhidimiz haqqında yazılmış mahnıların müəllifi bəstəkar-müğənni Ruslan Səfəroğlunun ifasında Milli Qəhrəman İlqar Mirzəyevə həsr etdiyi mahnı səsləndirilib.
Tədbirin bədii hissəsində Həzi Aslanov adına Ordu İdeoloji iş və Mədəniyyət Mərkəzinin solistlərinin ifasında hərbi-vətənpərvərlik mahnıları səsləndirilib.
Sonda Milli Qəhrəmanımız haqqında “Atama məktub” adlı kitabı qonaqlara təqdim olunub.
Bölmənin digər xəbərləri
