İnsan kəlləsi digər meymunlardan iki dəfə sürətli təkamül edib
Bakı, 6 noyabr, AZƏRTAC
UCL (London University College) alimləri müəyyən ediblər ki, insan kəlləsi digər meymun növlərinin kəllələrindən daha sürətlə təkamül edib.
AZƏRTAC “scitechdaily.com” saytına istinadla xəbər verir ki, tədqiqatın əsas nəticələrinə görə, 3D skan analizləri göstərib ki, insanların düz üzləri və böyük beyinləri gözləniləndən təxminən iki dəfə daha sürətli inkişaf edib. Bu dəyişikliklər insanların ağıllı və sosial varlıqlara çevrilməsində əsas rol oynayıb.
Alimlər insanlar, qorillalar, şimpanzelər və gibbonlar kimi müxtəlif primatların kəllələrindən 3D virtual modellər yaradıblar. Bu modellərin müqayisəsi göstərib ki, insanların kəllə forması ən çox dəyişən və ən sürətlə inkişaf edən olub. İnsanlarda kəllə forması və beyin böyüklüyü həm idrak qabiliyyətlərinin, həm də sosial davranışların inkişafı ilə sıx bağlıdır. Qorillalarda da nisbətən sürətli dəyişikliklər müşahidə edilsə də, bu daha çox sosial seçmə ilə əlaqələndirilir. Alimlərə görə, bu nəticələr insan beyninin və üz quruluşunun niyə bu qədər unikal olduğunu daha dərindən anlamağa kömək edir.
Araşdırma “Proceedings of the Royal Society B” jurnalında dərc olunub.
Bölmənin digər xəbərləri
