İran ilə Əfqanıstan arasında ticarət tamamilə dayandırılıb
Bakı, 10 avqust, AZƏRTAC
İran və Əfqanıstan arasında ticarət əlaqələri Əfqanıstanda təhlükəsizlik sahəsində vəziyyətin pisləşməsi fonunda tamamilə dayandırılıb.
AZƏRTAC xəbər verir ki, bu barədə ILNA agentliyi İran-Əfqanıstan ticarət palatasının rəhbəri Hüseyn Səlimiyə istinadla məlumat yayıb.
“Toqquşmalar və “Taliban” hərəkatı ilə hökumət qüvvələri arasında qarşıdurmanın yaratdığı problemlər, həmçinin dünən ABŞ-ın bu ölkəni bombalaması ticarətin dayanmasına və sərhədlərin bağlanmasına səbəb olub”, - deyə agentlik yazır.
Hüseyn Səliminin sözlərinə görə, belə bir şəraitdə ticarət riskləri çox böyükdür. İran satıcıları, habelə Əfqanıstandakı alıcılar bu riskləri üzərlərinə götürməyə hazır deyillər. Əfqanıstana göndərilən yükün alıcıya çatıb-çatmayacağı məlum deyil. Bununla yanaşı, yüklər sığorta olunmayıb və bütün bunlar riskləri hədsiz dərəcədə artırır. Eyni zamanda ticarətin nə vaxt bərpa ediləcəyini proqnozlaşdırmaq mümkün deyil. Bu, Əfqanıstandakı daxili vəziyyətdən asılı olacaq.
Bölmənin digər xəbərləri
