İranda nə üçün xəstələrə səhv diaqnozlar qoyulur?
Bakı, 7 iyun, AZƏRTAC
İran uzun illər boyunca Azərbaycan vətəndaşlarını aldatmaqla məşğul olub. Fərqli üsullardan istifadə edən İran Azərbaycan üzərindən məkrli planlar qurub. İranın təhlükəli taktikaları nəticəsində zəif iradəli adamlar təsir altına salınıb. Belə ki, İran öz səhiyyəsinin guya yüksək səviyyəsi haqqında açıq və dolayı reklam aparıb, azərbaycanlılarda bu ölkədə “keyfiyyətli və ucuz səhiyyə” təsəvvürü formalaşdırmağa çalışıb. Təəssüf ki, bu reklama inanaraq İrana gedən bir çox vətəndaşımız özünü və yaxınlarını təhlükəyə atıb. İran həkimlərinin isə Azərbaycan vətəndaşlarına necə haqsız yanaşdığını hamı görür.
Bu fikirləri AZƏRTAC-a açıqlamasında Sosial Tədqiqatlar Mərkəzinin (STM) sektor müdiri, politoloq Tural İsmayılov söyləyib.
"1979-cu ildə İran islam inqilabı nəticəsində hakimiyyətə gələn molla rejiminin radikal siyasəti nəticəsində bu ölkəyə qarşı ABŞ və Qərb tərəfindən tətbiq edilən sanksiyalar universal xarakter daşıyır. Nəticədə İran bütün texnoloji yeniliklərdən təcrid olunmuş ölkəyə çevrilib. Müasir dövrdə texnoloji yeniliklərdən kənar güclü səhiyyə sisteminin mövcudluğu isə qeyri-mümkündür. İran bütün dünyadan təcrid olunub və bu gün də onun elmdən, texnikadan qısır olmağı məlumdur. Dünyadan təcrid olunan belə bir rejimin tibb sahəsində uğur əldə etməsi də mümkünsüzdür. İran müxtəlif informasiya platformalarında insanları təbabət sahəsində aldadır", - deyə politoloq qeyd edib.
O bildirib ki, tətbiq edilən sanksiyalar ölkəyə müasir tibbi cihazların və avadanlıqların gətirilməsini məhdudlaşdırır. Ölkənin səhiyyə sistemində 1990-cı illərinin cihazları və avadanlıqları istifadə olunur. Həkimlərin hansı formada tibbi biliklər alması da suallar doğurur. İran təhsil sisteminin özü isə tamamilə keçmiş yanaşmalar əsasında qurulub. Sanksiyalar nəticəsində ölkəyə tibbi və kimyəvi maddələrin idxalına qadağa qoyulub. Bu da İranda istehsal edilən dərman preparatlarının keyfiyyətinin kəskin azalması ilə nəticələnib. Əhali keyfiyyətli dərmana əlçatanlıq baxımdan ciddi əziyyət çəkir. Belə vəziyyətdə səhiyyə sistemindən pul qazana bilməyən maraqlı şəxslər işbazlığa əl ataraq “İranda yüksək tibbi xidmət” adı altında vətəndaşlarımızı aldatmaqla bu ölkəyə səfərə cəlb edirlər. Bir sözlə İranda “tibb və səhiyyə” pərdəsi altında pul qazanmaq məqsədilə fərqli yalan və işbazlıq üzərində qurulmuş oyunlar həyata keçirilir. Bu çirkin plana aldanan vətəndaşlarımız isə həm sağlamlığını, həm də pullarını itirirlər.
T.İsmayılov əlavə edib ki, İranda xəstələrin tibb müəssisələrində daha çox qalmaları və pul xərcləmələri üçün bilərəkdən səhv diaqnozlar qoyulur, saxta analiz nəticələri təqdim edilir. Hətta bədənə müəyyən viruslar daxil etməklə yeni xəstəliklərin əsası qoyulur, insanlar qəsdən şikəst edilir. Bəzi hallarda isə insanlar vətənə qayıtdıqdan sonra İrandakı səhv müalicə nəticəsində onlarda yeni xəstəliklər əmələ gəlir. Bununla millətin genefonduna zərbə vurulur. Bir çox hallarda isə faciə üzərində pul qazanılır, insanlar da məxfi orqanlarla əməkdaşlığa məcbur edilir.
Artıq vətəndaşlarımız birmənalı şəkildə İrana səyahətdən imtina etməlidirlər.
Bölmənin digər xəbərləri
