İranda Xocalı soyqırımının qurbanları anılıb
Tehran, 26 fevral AZƏRTAC
Fevralın 26-da Xocalı soyqırımının 25-ci ildönümü ilə əlaqədar Azərbaycanın İrandakı səfirliyində tədbir keçirilib.
Tədbirdə İran Xarici İşlər Nazirliyinin əməkdaşları, İranın Azərbaycandakı sabiq səfirləri, Tehranda akkreditə olunmuş diplomatik korpusun üzvləri, KİV təmsilçiləri, bu ölkədə yaşayan azərbaycanlılar və yerli ictimaiyyətin nümayəndələri iştirak ediblər.
Əvvəlcə Xocalı soyqırımı qurbanlarının ruhuna müqəddəs “Qurani-Kərim”dən ayələr oxunub.
Sonra Heydər Əliyev Fondu tərəfindən Xocalı soyqırımı haqqında hazırlanmış qısametrajlı film nümayiş olunub.
Ölkəmizin İrandakı səfiri Bünyad Hüseynov çıxış edərək XX əsrin ən dəhşətli cinayəti olan Xocalı soyqırımı barədə ətraflı məlumat verib. Qeyd olunub ki, Ermənistanın Azərbaycana qarşı işğalçılıq və soyqırımı siyasətinin tərkib hissəsi olan Xocalı faciəsi ermənilərin dövlət səviyyəsində törətdikləri qanlı cinayətdir. 1992-ci il fevralın 25-dən 26-na keçən gecə erməni silahlı birləşmələrinin ağır texnikası Xocalıya yeridilib, şəhər yerlə-yeksan edilib, yaşayış evləri və sosial infrastruktur tamamilə dağıdılıb və yandırılıb. Xocalıda törədilən kütləvi qırğın nəticəsində 613 insan öldürülüb, yüzlərlə dinc sakin ağır yaralanıb, 1275 nəfər girov götürülüb. Əsir və girov götürülənlərə amansız işgəncələr verilib.
Səfir nəzərə çatdırıb ki, dünyada qəbul olunmuş beynəlxalq konvensiyalar, ümumbəşəri qanunlar Xocalı faciəsi kimi soyqırımı aktlarını pisləyir, belə halların yolverilməz olduğunu bildirir. Ermənistanın Azərbaycana qarşı təcavüzü zamanı BMT Baş Məclisinin qətnamələrində və konvensiyasında təsbit olunmuş soyqırımı cinayətini təşkil edən bütün əməllər tətbiq olunmuşdur. Bu hüquqi meyarlardan yanaşsaq, ermənilərin Xocalıda törətdikləri dəhşətli cinayətin soyqırımı olduğuna heç bir şübhə qalmır.
Diplomat, həmçinin vurğulayıb ki, Xocalı soyqırımına ilk dəfə hüquqi-siyasi qiyməti xalqımızın ümummilli lider Heydər Əliyev verib. Məhz onun təşəbbüsü ilə 1994-cü ilin fevralında Milli Məclis Xocalı soyqırımına hüquqi-siyasi qiymət verdi və faciənin araşdırılması üçün komissiya yaratdı.
Bu gün Heydər Əliyevin siyasi kursunu uğurla davam etdirən Prezident İlham Əliyev Xocalı soyqırımını dünya ictimaiyyətinə tanıtdırıb. Hazırda Xocalı soyqırımının tanınması Azərbaycanın xarici siyasətinin əsas istiqamətlərindən biri kimi müəyyənləşdirilib.
Heydər Əliyev Fondunun vitse-prezidenti Leyla xanım Əliyevanın təşəbbüsü ilə təsis olunan “Xocalıya ədalət!” kampaniyasının fəaliyyətinə 2009-cu ilin fevralından start verilib. Ötən müddət ərzində kampaniya böyük işlər görüb.
Azərbaycanın İrandakı hərbi attaşesi polkovnik Emin Əzimzadə bildirib ki, bu faciəni törətməklə Ermənistan Azərbaycana qarşı hərbi təcavüzünün miqyasını daha da genişləndirib. Ölkəmizin ayrılmaz tərkib hissəsi olan Dağlıq Qarabağ ilə yanaşı, Laçın, Kəlbəcər, Ağdam, Cəbrayıl, Füzuli, Qubadlı, Zəngilan rayonlarını işğal edib. Ermənistanın apardığı etnik təmizləmə siyasəti nəticəsində 20 min azərbaycanlının həyatına son qoyulub, torpaqlarımızın 20 faizi işğala məruz qalıb. İşğal nəticəsində bir milyondan çox azərbaycanlı qaçqın və məcburi köçkün vəziyyətinə düşüb, əsas hüquqları kobudcasına pozulub.
Hərbi attaşe vurğulayıb ki, bu gün Azərbaycan Ordusu özünün qüdrəti ilə seçilir. Azərbaycanın inkişaf etmiş iqtisadiyyatı güclü ordu yaratmağa imkan verib və Ali Baş Komandan İlham Əliyevin səyləri ilə ordumuz ən müasir silahlarla təchiz edilib. Azərbaycan Ordusu ötən ilin aprel ayında öz qüdrətini göstərərək bir sıra əraziləri işğaldan azad etdi.
Çıxışlardan sonra “Xocalıya ədalət!” adlı videoçarx nümayiş olunub. Tədbir iştirakçıları səfirlik tərəfindən hazırlanmış erməni təcavüzü və Xocalı soyqırımına aid kitablardan ibarət guşəyə baxıblar.
Sonda iştirakçılara Ermənistanın Azərbaycana qarşı törətdiyi terror aktlarını və təcavüzünü əks etdirən kitab, jurnal, disklər paylanıb.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
