İRANDA ZƏLZƏLƏ
AZƏRTAC İran mətbuatına istinadla xəbər verir ki, iyulun 10-da ölkənin cənubunda Rixter cədvəli ilə 5,6 və 5,8 bal gücündə iki şiddətli yeraltı təkan qeydə alınmışdır. Tələfat var. Təkanlar ölkənin cənubundakı Fars əyalətində olmuşdur. Daxili İşlər Nazirliyi zəlzələ nəticəsində ölənlərin olduğunu təsdiqləmiş, lakin eyni zamanda qeyd etmişdir ki, “ölənlərin sayı barədə hələlik heç bir dəqiq məlumata malik deyildir”. Nazirlik bəzi kəndlərin zərər çəkdiyini bildirmişdir. Bu kəndlər İranın əhalisi az olan bölgəsində yerləşir. Tehrandan alınmış son xəbərə görə, zəlzələ nəticəsində bir adam həlak olmuş, 20 nəfər yaralanmışdır. Qeyd edək ki, İran ərazisinin əksər hissəsi seysmik cəhətdən aktiv zonada yerləşir. Son 13 ildə ölkədə orta və böyük gücdə 950-dən çox zəlzələ baş vermiş və onların nəticəsində 17600 nəfər ölmüş, 53 mindən artıq adam xəsarət almışdır.
