İRAQDA ABŞ-IN İKİ HƏRBİ QULLUQÇUSU HƏLAK OLMUŞDUR
AZƏRTAC xarici mətbuata istinadla xəbər verir ki, iyulun 14-də Bağdad yaxınlığında koalisiya qüvvələrinə basqın nəticəsində ABŞ-ın iki hərbi qulluqçusu həlak olmuş, dörd nəfər isə yaralanmışdır. Bunu ABŞ-ın Mərkəzi Komandalığının nümayəndəsi bildirmişdir. İyulun 13-də gecə koalisiya qüvvələrinin patrulu Rəmadi şəhəri yaxınlığında pusquya düşərkən daha iki Amerika əsgəri yaralanmışdır. Amerika hərbi qüvvələrinin yerləşdiyi Əl-Fəlica şəhəri yaxınlığında partlayış baş vermişdir. Hadisənin təfərrüatı hələlik məlum deyildir. Monarxiya idarə üsuluna qarşı 1958-ci il inqilabının ildönümünün qeyd olunması ilə əlaqədar ABŞ hərbi administrasiyasının sərəncamına əsasən bütün İraq ərazisində ciddi təhlükəsizlik tədbirləri görülmüşdür. İraq Müvəqqəti İqtidar Şurası rejimin bütün bayramlarını ləğv etmişdir. “Əl-Qaidə”nin əvvəllər məlum olmayan “İslam silahlı birləşməsi”- “Əl-Fəluca” bölməsi İraqda koalisiya qoşunlarına qarşı çoxsaylı silahlı aksiyalara görə məsuliyyəti öz üzərinə götürmüşdür.
Bölmənin digər xəbərləri
