İŞĞAL EDİLMİŞ AZƏRBAYCAN TORPAQLARINDA ERMƏNİLƏRİN EKOLOJİ TERRORU

27.04.2006 [22:54]
Çap et
A⁺ A^-

Ekologiya və Təbii Sərvətlər Nazirliyi işğal edilmiş Azərbaycan torpaqlarında ermənilərin törətdikləri ekoloji terrora dair növbəti faktları açıqlamışdır. Nazirliyin mətbuat xidmətindən AZƏRTAC-a bildirmişlər ki, ermənilər 1993-cü ildə Zəngilan rayonunu işğal etdikdən sonra bu bölgə ekoloji terror nəticəsində “ölü zona”ya çevrilmişdir. Qacaran mis-molibden və Qafan mis-filiz kombinatlarının istehsal suları Ermənistandan başlayan və 35 kilometr məsafədə Zəngilan şəhərindən və rayonun 20 kəndindən keçərək, Azərbaycanın ikinci iri çayı Araza tökülən Oxçuçaya axıdılır. Orada ağır metalların, fenolların, radionuklidlərin və digər zərərli maddələrin səviyyəsi yol verilən normadan 1000 dəfə artıqdır. Bundan başqa, Ermənistanın həmsərhəd Şarikan kəndinin ərazisindəki kənd təsərrüfatı müəssisələrinin, Qafan şəhəri yaşayış massivlərinin tullantıları da bu çaya tökülür.

Nazirlikdə işğal olunmuş Cəbrayıl rayonunda ermənilərin törətdikləri dağıntılar barədə videomateriallar da var. Karxulu kəndi tamamilə viran edilmiş, kənd qəbiristanında məzar daşları sındırılmış və qarət olunmuşdur. Aparılmış müşahidələr və şahidlərin ifadələri Maralyan, Mərcanlı, Mehdili, Çaxırlı, Mahmudlu stansiyalarının, evlərin tamamilə dağıdıldığını, yollar boyunca və həyətlərdə əkilmiş qiymətli qoz ağaclarının dibindən kəsildiyini, Araz vadisində ətrafı yaxşı müşahidə etmək üçün bütün ağacların yandırıldığını sübut edir. Rayonun ərazisindəki respublika və yerli əhəmiyyətli 120-dək qədim memarlıq abidəsi yerlə-yeksan olunmuş, geniş ərazilərdə qiymətli ağac meşələri məhv olunmuşdur. Ermənilər yerli tikinti materialları yataqlarının, Diridağın nadir flora və faunası ilə fərqlənən guşələrini, habelə minerallarla zəngin olan içməli su qaynaqlarını dağıtmışlar. Əsirlikdən azad edilmiş sakinlər deyirlər ki, rayonun ərazisindəki çoxsaylı qoz ağacları kəsilir və Ermənistana göndərilir.

İŞĞAL EDİLMİŞ AZƏRBAYCAN TORPAQLARINDA ERMƏNİLƏRİN EKOLOJİ TERRORU

MÜƏLLİFLƏ ƏLAQƏ

Bölmənin digər xəbərləri