İSRAİL GƏLƏCƏKDƏ AZƏRBAYCANDAN QAZ ALMAQ İMKANINI NƏZƏRDƏN KEÇİRƏ BİLƏR
AZƏRTAC xəbər verir ki, İsrailin Azərbaycandakı səfiri Artur Lenk jurnalistlərə demişdir: “Bu gün belə bir məsələ gündəmdə olmasa da, gələcəkdə Azərbaycan qazının Qərb istiqamətində ixracı artdıqda İsrail Azərbaycandan qaz almağın mümkünlüyünü də nəzərdən keçirə bilər”. O qeyd etmişdir ki, indi İsrail Azərbaycandan yalnız neft alır.
Diplomat onu da bildirmişdir ki, gələn həftə İsrailin kənd təsərrüfatı naziri Şalom Simxon Bakıda keçiriləcək kənd təsərrüfatı sərgisində iştirak etmək üçün Azərbaycana gələcəkdir. Onu Azərbaycanda irriqasiya, kənd təsərrüfatı məhsulları istehsalı və sair sahələrin inkişafına kömək edə biləcək israilli sahibkarların böyük nümayəndə heyəti müşayiət edəcəkdir.
Səfir Artur Lenk qeyd etmişdir ki, onun ölkəsi yüksək texnologiyalar sahəsində təcrübə mübadiləsinə hazırdır. Səfirin fikrincə, bu ilin noyabr ayında keçiriləcək telekommunikasiya sərgisində iştirak etmək üçün Azərbaycan rabitə və informasiya texnologiyaları naziri Əli Abbasovun İsrailə səfəri buna kömək edə bilər.
Bölmənin digər xəbərləri
