İSRAİL PARLAMENTİNİN DEPUTATLARI AZƏRBAYCANA SƏFƏR EDƏCƏKLƏR

17.11.2006 [04:12]
Çap et
A⁺ A^-

AZƏRTAC xəbər verir ki, İsrail parlamentinin (Knesset) deputatları - “İsrail Bizim Evimizdir” Partiyasını təmsil edən Sofa Landver və “Şas” Partiyasının üzvü Amnon Koen noyabrın 20-23-də Azərbaycanda səfərdə olacaqlar.

İsrailin ölkəmizdəki səfirliyindən bildirmişlər ki, qonaqlar Qara dəniz İqtisadi Əməkdaşlıq Təşkilatı (QİƏT) Parlament Assambleyasının Bakıda keçiriləcək 28-ci ümumi iclasında iştirak edəcəklər.

QİƏT-də müşahidəçi statusuna malik olan İsrail qurumun fəaliyyətinə böyük maraq göstərir və artıq bir çox ümumi iclaslarda iştirak etmişdir.

Səfər müddətində Knesset üzvlərinin Milli Məclis, Xarici İşlər Nazirliyi, Xarici Ölkələrdə Yaşayan Azərbaycanlılarla İş üzrə Dövlət Komitəsi, habelə ölkəmizdəki yəhudi icmalarının rəhbərləri ilə görüşləri nəzərdə tutulmuşdur.

S.Landver və A.Koen “İsrail filmləri həftəsi”nin açılış mərasimində də iştirak edəcəklər.