REGİONLAR
İşsiz və işaxtaran şəxslərə əmək bazarının tələblərinə uyğun meyvəçilik sahəsi üzrə biliklər tədris olunacaq
![](/files/galleryphoto/2022/1/1200x630/16464899895363235708_1200x630.jpg)
![](/files/galleryphoto/2022/1/1200x630/16464899893604245019_1200x630.jpg)
![](/files/galleryphoto/2022/1/1200x630/16464899895308656293_1200x630.jpg)
![](/files/galleryphoto/2022/1/1200x630/1646489989375195658_1200x630.jpg)
![](/files/galleryphoto/2022/1/1200x630/1646489989379784482_1200x630.jpg)
![](/files/galleryphoto/2022/1/1200x630/16464899893291655826_1200x630.jpg)
Göyçay, 5 mart, AZƏRTAC
Göyçayda Kənd Təsərrüfatı Nazirliyinin Meyvəçilik və Çayçılıq Elmi-Tədqiqat İnstitutunun (ETİ) Dövlət Məşğulluq Agentliyinin tabeliyindəki Göyçay Peşə Hazırlığı Mərkəzi ilə ötən ilin dekabrında imzalanan əməkdaşlıq istiqamətlərinə uyğun olaraq, “Meyvəçilik üzrə aqrar təlim” layihəsinin təqdimatı keçirilib.
AZƏRTAC-ın bölgə müxbiri xəbər verir ki, Peşə Hazırlığı Mərkəzində keçirilən tədbirdə Meyvəçilik və Çayçılıq ETİ-nun şöbə müdiri Firuzə Hüseynova layihə ilə bağlı ətraflı məlumat verib. Sonra Dövlət Məşğulluq Agentliyinin idarə heyətinin sədr müavini Cəmaləddin Quliyev, Kənd Təsərrüfatı Nazirliyinin meyvəçilik və tərəvəzçilik şöbəsinin müdiri Surxay Novruzov, Göyçay Peşə Hazırlığı Mərkəzinin direktor müavini Əzizağa Atakişiyev, Meyvəçilik və Çayçılıq ETİ-nun direktoru İlham Qaraqurbanlı çıxış ediblər. Çıxışlarda vurğulanıb ki, layihə çərçivəsində işsiz və işaxtaran şəxslərə Meyvəçilik və Çayçılıq Elmi-Tədqiqat İnstitutunun əməkdaşları tərəfindən əmək bazarının tələblərinə uyğun meyvəçilik sahəsi üzrə biliklər tədris olunacaq. Əməkdaşlıq çərçivəsində kursu bitirənlərin Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyi tərəfindən işlə təmin edilmələrinə dəstək göstəriləcək. Layihə ilkin peşə, ixtisas hazırlığı olmayan işçi qüvvəsinin işlə təminatına imkan verdiyi kimi, onların müxtəlif peşə sahələri üzrə bilik və bacarıqlara yiyələnən işçi qüvvəsinə çevrilmələrinə də şərait yaradacaq.
Təlim kursları üçtərəfli - Dövlət Məşğulluq Agentliyi, Meyvəçilik və Çayçılıq ETİ və müavinlər tərəfindən müqavilələr əsasında təşkil ediləcək. Kurslar 2 aylıqdır və müasir təlim proqramlarından istifadə olunmaqla müdavimlərə meyvəçi usta, budamaçı, calaqçı və sair peşə sahələri üzrə biliklər öyrədiləcək. Layihənin hədəf qrupları 18-65 yaş arası işsiz və işaxtaran şəxslərdir. Hədəf regionları isə Göyçay, Ağdaş, Ağsu, Kürdəmir, Ucar, Zərdab, İmişli, Qəbələ və digər rayonlardır. Müraciət edən şəxslər ilk olaraq peşə bacarıqlarının müəyyən olunması məqsədilə baza təlimlərinə cəlb ediləcəklər. Kursu müvəffəqiyyətlə bitirən şəxslərə Meyvəçilik və Çayçılıq ETİ və Göyçay Peşə Hazırlığı Mərkəzi tərəfindən sertifikatlar veriləcək.
Qeyd edək ki, layihənin təqdimatından sonra iştirakçılar Göyçay Dayaq Məntəqəsinə səfər edib, burada “Meyvəçi usta” peşə ixtisası üzrə ilkin mərhələdə kurslara cəlb olunan 13 nəfərin təlimi ilə maraqlanıblar. Meyvəçilik və Çayçılıq ETİ-nun şöbə müdiri Vahid Əliyev müdavimlərə çalanın qazılması, verilən gübrə normaları, tingin budanması və əkin qaydaları barədə bilgilər verilib.