İstedad zəhmətlə tamamlandıqda uğur qaçılmazdır – bərdəli qardaşların uğuru
Bərdə, 5 may, Tahir Ağaməmmədov, AZƏRTAC
Bərdə şəhəri akademik Zərifə Əliyeva adına texniki fənlər təmayüllü liseyin şagirdləri Hidayət və Murad Quliyev qardaşları fizika fənni üzrə Respublika Fənn Olimpiadasının qalibi olublar.
AZƏRTAC-ın bölgə müxbiri xəbər verir ki, liseyin 9-cu sinif şagirdi Hidayət Quliyev birinci yer tutaraq qızıl, onun qardaşı 10-cu sinif şagirdi Murad Quliyev isə 3-cü yeri əldə edərək bürünc medal qazanıb.
Kiçik yaşlarından elmə və təhsilə böyük maraq göstərən Murad, xüsusilə fizika fənninə olan həvəsi və zəhməti ilə seçilir. O, bundan əvvəlki ildə də Respublika Fənn Olimpiadasında final mərhələsinə yüksəlib. 2024-cü ildə keçirilən 9-cu sinif buraxılış imtahanlarında isə ən yüksək nəticə olan 300 bal toplayaraq öz intellekti və hazırlığı ilə bir daha fərqlənib.
Zəhmətkeşliyi, biliyə olan marağı və yüksək intellektual potensialı ilə seçilən Hidayət ötən tədris ilində Respublika Fənn Olimpiadasında fizika fənni üzrə 3-cü yerin sahibi olub. Bu tədris ilində isə əzmkarlığı sayəsində fizika fənni üzrə qızıl medal qazanaraq bir daha sübut etdi ki, istedad zəhmətlə tamamlandıqda uğur qaçılmazdır.
Hər iki qardaşın arzusu həkim olmaqdır.
Bölmənin digər xəbərləri
