İtaliyanın daha dörd bələdiyyəsi Azərbaycana dəstək sənədləri qəbul edib
Roma, 30 dekabr, AZƏRTAC
İtaliyanın Neapol şəhərinin San Paolo Bel Sito bələdiyyəsi, Kataniya əyalətinin Kastel Di İudika bələdiyyəsi, Molise əyalətinin Lonqano bələdiyyəsi, Kieti əyalətinin Kastel Frentano bələdiyyəsi Ermənistanın Azərbaycana qarşı hərbi təcavüzü, etnik təmizləmə, soyqırımı siyasətini pisləyən, Azərbaycan xalqı, xüsusilə də Ermənistanın hərbi təcavüzü nəticəsində həyatını itirmiş və yaralanmış Gəncə, Bərdə, digər rayonların sakinlərinin ailə üzvləri ilə həmrəylik nümayiş etdirən, habelə Azərbaycan-İtaliya çoxölçülü strateji tərəfdaşlığının daha da gücləndirlilməsinə çağıran sənədlər qəbul ediblər.
AZƏRTAC xəbər verir ki, sənədlərdə Ermənistanın Azərbaycana qarşı hərbi təcavüz və etnik təmizləmə siyasəti nəticəsində Dağlıq Qarabağ və ətraf 7 rayon da daxil olmaqla, Azərbaycan ərazisinin 20 faizinin işğal olunduğu, 1 milyondan çox azərbaycanlının qaçqın və məcburi köçkün vəziyyətinə düşdüyü, azərbaycanlılara qarşı müharibə cinayətləri və Xocalı soyqırımının törədildiyi bildirilir. Habelə hərbi işğal dövründə azərbaycanlı qaçqın və məcburi köçkünlərin öz yurd-yuvalarına qayıda, ailə üzvlərinin məzarlarını ziyarət edə bilmədikləri vurğulanır.
BMT Təhlükəsizlik Şurası və Baş Assambleyasının münaqişə ilə bağlı qətnamələrinin Azərbaycanın suverenliyi, ərazi bütövlüyü və beynəlxalq səviyyədə tanınmış sərhədlərinə dəstək verərək Dağlıq Qarabağı ölkəmizin ayrılmaz tərkib hissəsi kimi tanıdığı, Ermənistan silahlı qüvvələrinin işğal olunmuş həmin ərazilərdən dərhal çıxarılmasını tələb etdiyi, lakin Ermənistanın bu sənədlərin heç birinə məhəl qoymadığı vurğulanır.
Avropa İnsan Hüquqları Məhkəməsinin 2015-ci il tarixli “Çıraqov və digərləri Ermənistana qarşı” işi ilə bağlı qərarında da Azərbaycanın Dağlıq Qarabağ və ətraf rayonlarının Ermənistan tərəfindən işğal edildiyinin təsdiqləndiyi bildirilir.
Sənədlərdə son aylarda Ermənistanın məqsədyönlü şəkildə silah və hərbi texnika idxalını əhəmiyyətli dərəcədə artırdığı, yeni müharibəyə hazırlaşmaq üçün hava hücumu sistemini intensiv şəkildə genişləndirdiyi və nəticədə sentyabrın 27-dən etibarən Azərbaycana qarşı yeni hərbi təcavüzə başladığı, qəsdən mülki obyektləri və mülki şəxsləri hədəfə aldığı diqqətə çatdırılaraq 94-dən çox mülki şəxsin qətlə yetirilməsi, 407-dən çox mülki şəxsin yaralanması ilə nəticələnən Gəncə, Bərdə və sair şəhərlərin bombalaması qəti şəkildə pislənilir.
Həmçinin beynəlxalq hüququn norma və prinsiplərinə, Azərbaycanın suverenliyi, ərazi bütövlüyü və beynəlxalq səviyyədə tanınmış sərhədlərinin toxunulmazlığına dəstək ifadə olunur, azərbaycanlı qaçqın və məcburi köçkünlərin öz doğma yurdlarına qayıtmaq hüququnun təmin edilməli olduğu vurğulanır.
Eyni zamanda, noyabrın 10-da Azərbaycan Respublikası Prezidenti, Ermənistan Respublikasının baş naziri və Rusiya Federasiyasının Prezidentinin imzaladığı Bəyanatın məhz münaqişəyə son qoymaq məqsədi daşıdığı qeyd olunur, həmin bəyanatın imzalanmasından dərhal sonra istər İtaliya Respublikasının Xarici İşlər və Beynəlxalq Əməkdaşlıq Nazirliyi, istərsə də müvafiq qətnamə ilə İtaliya Parlamentinin Deputatlar Palatası tərəfindən alqışlandığı bildirilir.
Bələdiyyələr öz sənədləri ilə, həmçinin rəsmi İtaliyanın davamlı olaraq Azərbaycanın ərazi bütövlüyünü dəstəklədiyinə diqqəti çəkir və bu xüsusda, Azərbaycan Respublikası Prezidentinin cari ilin fevralında bu ölkəyə dövlət səfəri zamanı imzalanmış “İtaliya Respublikası ilə Azərbaycan Respublikası arasında Çoxölçülü Strateji Tərəfdaşlığın gücləndirilməsinə dair Birgə Bəyannamə”nin müvafiq müddəalarına istinad edirlər.
Habelə sənədlərdə strateji tərəfdaşlar olan Azərbaycan ilə İtaliya arasında siyasi, iqtisadi, enerji, mədəniyyət, mədəni, tarixi, dini irsin qorunması, akademik, texnoloji və səhiyyə sahələrində geniş əməkdaşlığın mövcud olduğu, öz torpaqlarını işğaldan azad etmiş ölkəmizin yeni inkişaf mərhələsinə daxil olduğu, həmin ərazilərin bərpası və yenidən qurulması üzrə başlatdığı önəmli strateji planın italyan şirkətləri üçün yeni imkanlar yarada biləcəyi, bütün bu səbəblərə görə və iki ölkə arasında çoxölçülü strateji tərəfdaşlığın daha da gücləndirilməsi üçün İtaliya hökumətinə müvafiq addımları davam etdirməyə çağırış edilir.
Qeyd edək ki, bundan əvvəl oxşar sənədlər İtaliyanın Kataniya şəhər Şurası, Kataniya əyalətinin Gravina di Kataniya bələdiyyəsi, Neapol şəhərinin Ottaviano və Liveri bələdiyyələri, Kaserta əyalətinin Santa Maria a Viko, Draqoni, Qalluççio və Presenzano bələdiyyələri, Kampobasso əyalətinin Sepino və San Culiano del Sannio bələdiyyələri, Avellino əyalətinin Montoro bələdiyyəsi, İserniya əyalətinin Rokkasikura bələdiyyəsi, Milan şəhərinin Korbetta bələdiyyəsi tərəfindən də qəbul edilib.
Elgün Niftəli
AZƏRTAC-ın xüsusi müxbiri
Roma
Bölmənin digər xəbərləri
