İTALİYANIN “MİLAN” KLUBUNUN MƏŞQÇİLƏRİ BAKIDA YENİYETMƏ VƏ UŞAQLAR ÜÇÜN TƏLİMLƏR KEÇƏCƏKLƏR
AZƏRTAC xəbər verir ki, İtaliyanın məşhur “Milan” futbol klubunun məşqçi heyəti Bakıya gələcəkdir.
Məqsəd “Milan Junior Camp” layihəsinin Bakıda həyata keçirməkdən ibarətdir. Bu layihə Avstriya, Almaniya, İrlandiya, İngiltərə, Kanada, ABŞ, Braziliya, Argentina, Albaniya, Venesuela, Macarıstan, Slovakiyada və digər ölkələrdə uşaqlarda futbol vərdişlərini inkişaf etdirmək məqsədi ilə həyata keçirilir.
Bakının “İnter” peşəkar futbol klubunun dəstəyi ilə oktyabrın 27-dən 30-dək “Şəfa” İdman-Sağlamlıq Kompleksində təşkil olunacaq “Milan Junior Camp” layihəsi çərçivəsində bir həftə ərzində 300 yeniyetmə futbolçuya texniki və atletik təlimlər keçiləcəkdir.
Oktyabrın 25-26-da isə “Milan”ın məşqçi heyəti təcrübi və nəzəri seminarlar aparacaqdır. Bundan əlavə, xarici mütəxəssislər seminarlarda İtaliya futbol idarəçiliyinin və peşəkar klubların yeniyetmələrlə iş sektorunda hədəf götürülən strategiyanın sirlərini həmkarları ilə bölüşəcəklər.
Bununla bağlı Bakıdakı “Excelsior” mehmanxanasında “Milan”ın və İtaliya yığma komandasının keçmiş çempionları Daniel Massaro, hazırda “Milan”ın icraçı meneceri Franko Barezi, o cümlədən klubun marketinq meneceri Franceska Piyetranın iştirakı ilə mətbuat konfransı keçiriləcəkdir.
Bölmənin digər xəbərləri
