“Kapital Bank”ın müştəriləri "Elektron hökumət" portalından faydalana biləcəklər
Bakı, 9 fevral, AZƏRTAC
"Kapital Bank"ın müştəriləri "Elektron hökumət" portalı vasitəsilə təqdim edilən "Elektron arayış"lardan istifadə olunmaqla bank xidmətlərinə müraciət edə biləcəklər.
Rabitə və Yüksək Texnologiyalar Nazirliyindən AZƏRTAC-a bildirilib ki, elektron arayış müxtəlif dövlət orqanlarının elektron informasiya ehtiyatları əsasında hazırlanmış elektron sənəddir. "Elektron arayış"lar bank xidmətlərindən istifadə zamanı vaxt itkisinin qarşısını almaqla vətəndaşın rahatlığını təmin edir. Xidmətin digər üstünlüyü də vətəndaşın işlədiyi müəssisədən arayış almaq zərurətinin aradan qaldırılmasıdır.
Portalın istifadəçisi isə istənilən yerdən portala daxil olaraq bankın tələb etdiyi arayışları çap edə və ya elektron şəkildə banka ünvanlaya bilər. Sonra elektron arayış portal vasitəsilə təqdim olunan "Elektron arayışların yoxlanılması" xidməti vasitəsilə yoxlanılır.
Qeyd edək ki, xidmət hazırda bankın 1 saylı Səbail, 1 saylı Xətai, 2 saylı Nizami, 2 saylı Nəsimi filiallarında mövcuddur. Yaxın gələcəkdə bu xidmət bankın digər filiallarında da tətbiq olunacaq.
Bölmənin digər xəbərləri
