Karate üzrə Azərbaycan millisi Mərakeşdə beynəlxalq turnirdə iştirak edəcək
Bakı, 13 aprel, AZƏRTAC
Azərbaycanın kişi karateçilərdən ibarət əsas milli komandası aprelin 14-16-da Mərakeşin paytaxtı Rabatda Dünya Karate Federasiyasının növbəti “Karate-1” Premyer Liqa turnirində iştirak edəcək.
AZƏRTAC xəbər verir ki, nüfuzlu yarışda mübarizə aparacaq milli komandamızın heyətinə səkkiz idmançı daxil edilib. Federasiyanın birinci vitse-prezidenti və milli komandanın baş məşqçisi vəzifəsini icra edən Rəhman Hətəmov heyətdə IV İslam Həmrəyliyi Oyunlarında çıxış edəcək karateçilərə üstünlük verib.
Komandanın böyük məşqçisi Seymur Hüseynovla birgə idmançılarımızdan Firdovsi Fərzəliyev (60 kq), Niyazi Əliyev (67 kq), Tural Ağalarzadə (67 kq), Rafael Ağayev (75 kq), Ayxan Mamayev (87 kq) və Asiman Qurbanlı (84 kq-dan yuxarı), həmçinin legionerlərimiz İrina Zaretska (68 kq) və Dorota Balciarova (kata) Mərakeşə yola düşəcəklər.
Bundan başqa, beynəlxalq hakim Cahangir Babayev, media və ictimaiyyətlə işlər üzrə katib Sənan Məhərrəmov da Mərakeşə ezam olunublar.
Beynəlxalq reytinq xalları verən nüfuzlu yarışa 47 ölkədən 547 idmançı qatılacaq.
Bölmənin digər xəbərləri
