KİNO RƏSSAMI MƏMMƏD HÜSEYNOVUN 80 İLLİK YUBİLEYİ QEYD OLUNACAQDIR
Bakı, 18 fevral (AZƏRTAC). Martın 11-də Muzey Mərkəzində Azərbaycanın xalq rəssamı, uzun illər Azərbaycan kinosunda çalışmış kino rəssamı Məmməd Hüseynovun anadan olmasının 80 illik yubileyi ilə əlaqədar xatirə gecəsi keçiriləcəkdir. Tədbir Dövlət Film Fondunun təşkilatçılığı ilə baş tutacaqdır. Fondun direktoru, əməkdar incəsənət xadimi Cəmil Quliyev bildirmişdir ki, M.Hüseynov Azərbaycanın bir çox məşhur bədii filmlərinin quruluşçu rəssamı olmuşdur. Bu filmlər sırasında “Ögey ana”, “Bizim Cəbiş müəllim”, “Nəsimi”, “Böyük dayaq”, “Əhməd haradadır”, “Asif, Vasif, Ağasif”, “O qızı tapın”, “Sehrli xalat”, “Səhər”, “Bizim küçə”, “Kölgələr” və digərləri vardır.
Həmin gün Muzey Mərkəzinin foyesində kino rəssamının həyat və yaradıcılığını əks etdirən fotosərgi də təşkil olunacaqdır. Mərhum rəssamın yubiley tədbirləri çərçivəsində Azərbaycan Rəssamlar İttifaqının sərgi qalereyerasında M.Hüseynovun rəsm əsərlərindən ibarət sərginin də keçirilməsi nəzərdə tutulur.
Bölmənin digər xəbərləri
