İDMAN
Kişilər arasında 25 metrdən tapança ilə sürətli atəşaçma yarışının qalibi Almaniya idmançısı olub [YENİLƏNİB]
Kişilər arasında 25 metrdən tapança ilə sürətli atəşaçma yarışının qalibi Almaniya idmançısı Kristian Rayts olub. O, qızıl medal uğrunda mübarizədə rəqiblərindən üstün oyun nümayiş etdirərək fəxri kürsünün ən yüksək pilləsinə qalxıb və “Rio-2016” Yay Olimpiya Oyunlarında iştirak hüququ qazanıb.
İkinci yerə rusiyalı Aliqsey Klimov, üçüncü yerə isə almaniyalı Oliver Geis çıxıblar.
Xatırladaq ki, finalda birincilik uğrunda Fransa, Almaniya, Ukrayna, İspaniya və Rusiyadan 6 idmançı mübarizə aparıb.
16:18
Kişilər arasında dairəvi stend yarışının qalibi İtaliya idmançısı Valerio Lukini olub.
Qızıl medal uğrunda mübarizədə Valerio Lukini isveçli Stefan Nilssondan üstün oyun nümayiş etdirərək birinci Avropa Oyunlarının çempionu adını qazanıb. Üçüncü yerə isə finlandiyalı Marko Kemppainen çıxıb.
Valerio Lukini, həmçinin “Rio-2016” Yay Olimpiya Oyunlarında iştirak hüququ əldə edib.
İtaliyalı idmançı dəfələrlə dünya və Avropa çempionatlarının iştirakçısı olub.
Kişilər arasında 25 metrdən tapança ilə sürətli atəşaçma yarışının finalçıları da məlum olub. Finalda birincilik uğrunda Fransa, Almaniya, Ukrayna, İspaniya və Rusiyadan 6 idmançı mübarizə aparacaq.
Bu yarışda Azərbaycanı təmsil edən Ruslan Lunev ikinci təsnifat mərhələsində mübarizəni dayandırıb.
14:57
Kişilər arasında dairəvi stend yarışının yarımfinalçıları müəyyənləşib. Otuz idmançının iştirak etdiyi təsnifat mərhələsindən yarımfinala altı ölkə - Fransa, Çexiya, İtaliya, Danimarka, İsveç və Finlandiya atıcıları yüksəliblər.
Bu yarışda ölkəmizi təmsil edən Paşa Ahadpur Xangah və Emin Cəfərov mübarizəni təsnifat mərhələsində dayandırıblar.
14:01
Kişilər arasında 50 metrdən üç vəziyyətdə tüfəng ilə atəşaçma yarışının qızıl medalını Fransa idmançısı Valerian Sauveplane qazanıb. O, finalda italiyalı Marco de Nicolo, almaniyalı Mixael Yanker, xorvatiyalı Petar Gorsa, belaruslu Vitali Bubnoviç, ukraynalı Yuriy Suxorukov, isveçrəli Jan Loxbixler və rusiyalı Sergey Kamenskidən daha sərrast atəş açıb (456.2 xal).
Bu qələbə sayəsində idmançı, həmçinin "Rio-2016" Yay Olimpiya Oyunlarında iştirak hüququ əldə edib.
İkinci yerə xorvatiyalı Petar Gorsa, üçüncü yerə isə belaruslu Vitali Bubnoviç çıxıblar.
Qaliblərə medalları Avropa Atıcılıq Konfederasiyasının baş katibi Aleksandr Ratner təqdim edib.
12:03
"Bakı-2015" birinci Avropa Oyunlarının atıcılıq idman növündə kişilərin 50 metrdən üç vəziyyətdə tüfəng ilə atəşaçma yarışının finalçıları məlum olub.
Finalda italiyalı Marco de Nicolo, almaniyalı Mixael Yanker, fransalı Valerian Sauveplane, xorvatiyalı Petar Gorsa, belaruslu Vitali Bubnoviç, ukraynalı Yuriy Suxorukov, isveçrəli Jan Loxbixler və rusiyalı Sergey Kamenski mübarizə aparacaqlar. Yarışın qalibi qızıl medal almaqla yanaşı gələn il Braziliyada keçiriləcək Yay Olimpiya Oyunlarında iştirak hüququ da qazanacaq.
Bu yarışda Azərbaycan təmsilçisi iştirak etmir.
Qeyd edək ki, finalda mübarizə aparan belaruslu idmançı Vitali Bubnoviç "Bakı-2015"in kişilər arasında 10 metrdən hava tüfəngi ilə atəş yarışının qalibidir.
10:15
Bakı, 21 iyun, Məhərrəm Əlioğlu, AZƏRTAC
İyunun 21-də Bakı Atıcılıq Mərkəzində "Bakı-2015" birinci Avropa Oyunlarının atıcılıq yarışlarının altıncı gününün yarışları başlayıb.
AZƏRTAC xəbər verir ki, bu gün kişilər arasında 50 metrdən üç vəziyyətdə tüfəng ilə atəşaçma, 25 metrdən tapança ilə sürətli atəşaçma və dairəvi stend yarışının ikinci təsnifat mərhələsi keçiriləcək.
Kişilər arasında 25 metrdən tapança ilə sürətli atəşaçma yarışında ölkəmizi Ruslan Lunev, dairəvi stend yarışında isə Paşa Ahadpur Xangah və Emin Cəfərov təmsil edirlər.