KİTAB KLUBU FƏALİYYƏT SAHƏSİNİ GENİŞLƏNDİRİR

25.04.2006 [20:09]
Çap et
A⁺ A^-

Kitab Klubunun direktoru Elxan Rzayev AZƏRTAC-a bildirmişdir ki, təşkilatın məqsədi Azərbaycanda nəşriyyat işinin səmərəli qurulmasına və kitab bazarının normal qaydalar üzrə işləməsinə yardım göstərməkdir. İlk növbədə, kitab bazarının vəziyyətini öyrənib, bu barədə məlumatları naşir və müəlliflərə, yeni nəşr olunmuş və olunacaq kitablar haqqında məlumatı isə potensial oxuculara çatdırmaqdır.

Bu məsələləri həll etmək üçün klubun 1000 nüsxə ilə çap edilən, respublikanın bütün rayonlarına və xarici ölkələrə - Almaniya, İsveç, Belçika və Fransaya - yayılan rüblük, rəngli “Azərbaycan nəşrləri” jurnal-kataloqu, vvvvvv.kitabklubu.org ünvanlı internet səhifəsi, 500 kitablıq daimi işləyən sərgi salonu, təqdimatların və görüşlərin keçirilməsi üçün zalı vardır. Son dəfə klubda gənc yazıçı Elçin Həsənovun “Katana” detektiv əsərinin təqdimatı uğurla keçmişdir.

Klub may ayında V.Səmədova adına sərgi salonunda (Xaqani küç. 21) respublika kitab satış-sərgisini təşkil etməyi nəzərdə tutmuşdur.