KİTAB KLUBUNDA BEYNƏLXALQ KİTAB SƏRGİSİNİN YEKUNLARINA HƏSR OLUNMUŞ MƏTBUAT KONFRANSI
AZƏRTAC xəbər verir ki, mayın 17-də Kitab Klubunda XXI Tehran Beynəlxalq Kitab Sərgisinin yekunlarına həsr olunmuş mətbuat konfransı keçirilmişdir.
Konfransı Kitab Klubunun rəhbəri Elxan Rzayev açaraq bildirmişdir ki, mayın 1-dən 11-dək davam edən XXI Tehran Beynəlxalq Kitab Sərgisində Azərbaycanı Kitab Klubu təmsil etmişdir. Natiq qeyd etmişdir ki, bölmələrdən biri İqtisadi Əməkdaşlıq Təşkilatının (İƏT) üzvü olan ölkə kimi Azərbaycan üçün ayrılmışdır. Ölkəmizin İrandakı səfirliyi həmin bölməni rəngarəng nəşrlərlə təchiz etmişdir. İkinci bölmə isə Kitab Klubu və Beynəlxalq “Əl-Hoda” nəşriyyatının Bakı şöbəsi tərəfindən təchiz edilmişdir. E.Rzayev bildirmişdir ki, sərginin Azərbaycan bölməsində Qarabağ münaqişəsindən, Xocalı soyqırımından bəhs edən, Azərbaycan tarixi və dili ilə bağlı ümumilikdə 150 adda kitab təqdim olunmuşdur.
Bildirilmişdir ki, sərgiyə “Qanun”, “Şərq-Qərb”, “Adiloğlu”, “Altun kitab”, “Azərnəşr” və s. nəşriyyatların məhsulları aparılmış, Tehrandan isə ərəb qrafikası ilə Azərbaycan dilində nəşr edilmiş kitab nümunələri gətirilmişdir.
Konfransda kitab satışı və çapı ilə bağlı digər məsələlərdən də söhbət açılmışdır.
Bölmənin digər xəbərləri
