Bakı, 8 may, AZƏRTAC

Cəfər Cabbarlı adına Respublika Gənclər Kitabxanasında “Heydər Əliyev İli” çərçivəsində “Ulu Öndər Heydər Əliyevin Azərbaycan poeziyasının inkişafında əvəzolunmaz rolu” adlı tədbir təşkil olunub.

AZƏRTAC xəbər verir ki, kitabxananın “Mirvarid Dilbazi Poeziya Məclisi” İctimai Birliyinin birgə təşkilatçılığı ilə keçirdiyi tədbirdə Ulu Öndər Heydər Əliyevin və torpaqlarımızın azadlığı uğrunda canlarını qurban vermiş şəhidlərimizin əziz xatirəsinin bir dəqiqəlik sükutla yad edilib. Kitabxananın direktoru Aslan Cəfərov çıxışında öz uzaqgörən və müdrik siyasəti ilə Azərbaycan dövlətçiliyinin tarixində əbədilik qazanan, tariximizdə yeni parlaq səhifə açan nadir, fenomen, bənzərsiz dahi şəxsiyyət olan Ümummilli Lider Heydər Əliyevin mənalı həyat yolu, zəngin və çoxşaxəli irsinin Azərbaycan xalqı üçün tükənməz bir miras olduğunu söyləyib. Xalqımızın dahi lideri, bütün türk dünyasının görkəmli şəxsiyyəti Ulu Öndər Heydər Əliyevin beynəlxalq aləmdə yaxşı tanınmış və artıq öz sağlığında tarix yaradan və tarixə düşmüş nəhəng siyasətçi olduğunu söyləyərək, onun bütün həyatını xalqının azad, firavan, xoşbəxt rifahına, qüdrətli Azərbaycan dövlətinin yaradılmasına və inkişafına həsr etdiyini bildirib. Bütün türk dünyasının və Azərbaycanın dövlətçilik tarixinə nəzər salaraq, Heydər Əliyev kimi dahi şəxsiyyətlərin bir neçə əsrdən bir bəşəriyyətə bəxş olunduğunu və müstəqil, qüdrətli, qalib Azərbaycanın dünəni, bu günü və sabahında Heydər Əliyev möhürünün olduğunu bildirib.

Elmi işlər üzrə direktor müavini Günay Həsənova “Heydər Əliyev İli” ilə əlaqədar olaraq kitabxananın həyata keçirdiyi “Tarix yaradan şəxsiyyət-Heydər Əliyev 100” layihəsi çərçivəsində təşkil olunan tədbir, görüş, seminarlar haqqında məlumat verib.

“Mirvarid Dilbazi Poeziya Məclisi” İctimai Birliyinin sədri, Kəlağayı muzeyinin direktoru, şair-publisist Güllü Eldar Tomarlı çıxışında Ulu Öndər Heydər Əliyevin daima mədəniyyətimizin, ədəbiyyatımızın, milli-mənəvi dəyərlərimizin qorunması, inkişafı və gələcək nəsillərə ötürülməsi məsələsinə xüsusi həssaslıqla yanaşmasından, Azərbaycan mədəniyyətinin inciləri hesab edilən muğam, aşıq sənətinin inkişafına göstərdiyi diqqət və qayğıdan danışıb.

Azərbaycan Yazıçılar Birliyinin və Azərbaycan Aşıqlar Birliyinin üzvü, Gürcüstanın Şərəf ordenli şairi Səadət Buta Heydər Əliyevin tarixi köklərimizə, türk dünyasının qədim eposlarına, folklorumuza, saz-söz sənətinə daim yüksək qiymət verdiyini söyləyərək, məhz bu qayğı nəticəsində mədəni irsimizin, incəsənətimizin, o cümlədən aşıq sənətimizin dünya miqyasında tanındığını söyləyib.

Vətən müharibəsi şəhidi Xansu Qurbanovun anası Yəmən Abbasova çıxışında müstəqil ölkəmizin bugünkü nailiyyətlərinin, Şanlı qələbəsinin Heydər Əliyev strategiyasının təntənəsi olduğunu və Ulu Öndərin siyasi kursunun Prezident, Ali Baş Komandan İlham Əliyev tərəfindən uğurla davam etdirildiyini bildirib.

Tədbirdə “Heydər Əliyev və Azərbaycanda nitq mədəniyyəti”, “Heydər Əliyev müstəqil Azərbaycanın qurucusu”, “Heydər Əliyev mədəniyyətimizin himayədarı” mövzularında məruzələr dinlənilib.

Sonra “Tarix yaradan şəxsiyyət - Heydər Əliyev 100” adlı videomaterial nümayiş olunub, Mirvarid Dilbazinin şeirləri səsləndirilib, aşıq-sənət nümunələri ifa edilib.