KÜRDƏMİRDƏ GÖRKƏMLİ ALİM, NƏCİB İNSAN ZƏRİFƏ ƏLİYEVANIN 85 İLLİYİ QEYD OLUNMUŞDUR
Azər TAc xəbər verir ki, Kürdəmir Rayon Mərkəzi Xəstəxanasında görkəmli oftalmoloq alim, nəcib insan, akademik Zərifə xanım Əliyevanın 85 illiyi yubileyi münasibətilə tədbir keçirilmişdir.
Çoxsaylı səhiyyə işçilərinin, ictimaiyyət nümayəndələrinin iştirakı ilə keçirilən tədbirdə rayon icra hakimiyyəti başçısının təhsil, səhiyyə və mədəniyyət məsələləri üzrə müavini Ə.Mikayılov akademik Zərifə xanım Əliyevanın həyat və elmi fəaliyyəti barədə danışmışdır.
Tədbirdə çıxış edənlər görkəmli alim, Azərbaycan səhiyyəsi və tibb elminin inkişafında müstəsna xidmətləri olan Zərifə xanım Əliyevanın fəaliyyətindən, nəcib əməllərindən bəhs etmişlər. Zərifə Əliyevanın Azərbaycanda oftalmologiya elminin inkişafında böyük xidmətləri olduğunu qeyd edən natiqlər onun çoxillik elmi-tədqiqat işlərinin nəticələrini yüksək qiymətləndirmişlər.
Qeyd olunmuşdur ki, akademik Zərifə Əliyeva həm də bir müəllim kimi çoxillik təcrübəsi, böyük zəhməti sayəsində qazandığı bilikləri illər uzunu həkimlərə öyrətmişdir. Onun rəhbərliyi altında doktorluq və namizədlik dissertasiyaları müdafiə edilmişdir. Zərifə xanım Əliyevanın ən böyük xidmətlərindən biri də onun Azərbaycanda oftalmologiya üzrə yeni bir məktəb yaratmasıdır. Bildirilmişdir ki, bu gün də tibb işçiləri bu məktəbdən faydalanırlar.
