DÜNYA
“Kyocera” şirkəti elektrik enerjisi fabriki inşa etmişdir
Bakı, 14 noyabr (AZƏRTAC). Yaponiyanın smartfon istehsalçısı “Kyocera” şirkəti bu yaxınlarda ölkədə günəş batareyalarının köməyi ilə elektrik enerjisinin istehsalı üzrə fabriki işə salmışdır. Elektrik stansiyasının ümumi gücü 70 meqavat təşkil edir ki, bu da 22 minə yaxın evi ekoloji baxımdan təmiz elektrik enerjisi ilə təchiz etməyə imkan verir.
Fabrikin tikinti layihəsi ümumilikdə 127 hektar ərazini (Vatikan ərazisindən 3 dəfə çox) əhatə edən 290 min günəş batareyasından istifadəni nəzərdə tutur. Layihənin miqyası geniş və mürəkkəb olduğundan burada “Kyocera” ilə yanaşı, daha 6 yerli şirkət iştirak edir. Onlar elektrik enerjisinin satışından əldə olunan gəliri yerli “Kyushu Electric Power” müəssisəsi ilə bölüşəcəklər.