DÜNYA
LA-MANŞ BOĞAZINDA BATMIŞ GƏMİNİN ANBARINDA 2800-DƏN ÇOX AVTOMOBİL VAR
Böyük Britaniyanı və Fransanı bir-birindən ayıran La-Manş boğazında iki gəminin toqquşması nəticəsində təxminən üç min ən məşhur markalı avtomobil dənizin dibinə düşmüşdür.
İTAR-TASS-ın verdiyi xəbərə görə, Norveçin “Trikolor” və Baham adalarında qeydiyyata alınmış “Kariba” yük gəmiləri Dünkerk limanından 20 mil şimalda toqquşmuşdur. “Trikolor” tezliklə batmışdır. Heyət üzvlərindən heç kim xəsarət almamışdır, lakin 2862 avtomaşın dənizin dibinə getmişdir.
Digər gəmi də ciddi zədələr almış, amma batmamışdır. Onu yedəyə alaraq, Antverpen limanına aparmışlar.
“Trikolor”un anbarlarındakı avtomobilləri sudan çıxara bilsələr də onları bərpa etmək mümkün olmayacaqdır. Gəmi sahibinin dediyinə görə gəmi böyrü üstə çevrildikdən sonra bütün maşınlar əzik-əzik olmalıdır. Onun hesablamalarına görə, dənizə qərq olmuş bahalı BMV, “Volvo” və “Saab” markalı maşınların dəyəri azı 30 milyon avrodur.
Nisbətən dayaz yerdə batan “Trikolor” hazırda sol böyrü üstündədir və onun bir hissəsi suyun səthinə çıxmışdır. Fransanın hakimiyyət orqanları Norveç şirkətindən təcili surətdə gəminin qaldırılmasına başlamağı və onun çənlərindəki 2 min ton yanacağın çəkilib çıxarılmasını tələb etmişlər. Şirkətin sahibləri mümkün bütün işləri görməyə söz vermişlər, lakin əlverişsiz hava şəraiti Hollandiyadan gələn xüsusi gəminin işə başlamasına və dənizin çirklənmə dərəcəsini müəyyənləşdirməyə mane olur.