LAKŞMİ MİTTAL BÖYÜK BRİTANİYANIN ƏN ZƏNGİN ADAMI SAYILMIŞDIR

24.04.2006 [17:48]
Çap et
A⁺ A^-

AZƏRTAC xəbər verir ki, Böyük Britaniyanın “Sandi Tayms” həftəlik qəzeti ölkədə yaşayan və vergi ödəyən ən zəngin adamların siyahısını açıqlamışdır. Siyahıya “Mittal Stil” metallurgiya qrupunun sahibi Lakşmi Mittal başçılıq edir. Onun sərvəti 14,8 milyrad funt sterlinqdir. Əslən hindistanlı olan L.Mittal ötən il Ukrayna sənayesinin flaqmanı “Krivorojstal” şirkətini almışdır.

İkinci yerdə rusiyalı Roman Abramoviç gəlir. “Sandi Tayms” iqtisadi xidmətinin hesablamalarına görə, onun sərvəti 10,8 milyard funt sterlinqə çatır. Üçüncü yeri isə İngiltərədə və bütövlükdə Avropada daşınmaz əmlaka və torpaq sahələrinə malik Vestminster hersoqu tutur.

Böyük Britaniyanın 10 ən varlı adamı arasında daha bir rusiyalı var. Telekommunikasiya və sənaye biznesi ilə məşğul olan Leonid Blavatnik siyahıda altıncı yerdədir. Onun şəxsi var-dövləti 4,76 milyard funt sterlinq məbləğində qiymətləndirilir.

Böyük Britaniya kraliçası II Elizabet 300 milyon funt sterlinqlə 192-ci yerdədir.