LATVİYA PREZİDENTİ VAYRA VİKE-FREYBERQANIN NİTQİ
- Zati-aliləri cənab Azərbaycan Prezidenti!
Hörmətli xanım Əliyeva!
Xanımlar və cənablar!
Zati-aliləri, çox şadam ki, Siz mənim təklifimi qəbul edərək, dövlətlərimiz müstəqilliyini bərpa etdiyi və diplomatik əlaqələrin yaradıldığı vaxtdan sonra ilk dəfə olaraq Latviyaya səfər etmisiniz.
Düz bir il öncə, 2005-ci il oktyabrın 3-4-də Latviya Prezidentinin Azərbaycana ilk səfəri olmuşdur. Mən son dərəcə gözəl Azərbaycan torpağına səfər etmək və Sizin xalqınızın qonaqpərvərliyi ilə tanış olmaq şərəfinə nail olmuşam. Sizin ölkənizə səfərim zamanı Köhnə Bakını - İçərişəhəri ziyarət etmək imkanım olub, hansı ki, eynilə hazırda bizim olduğumuz Köhnə Riqa kimi parlaq bir arxitektura abidəsidir və YUNESKO-nun Dünya İrsi Siyahısına salınmışdır.
Biz Köhnə Riqanın tarixinin ən parlaq şahidlərindən biri olan Qarabaşlılar Evi binasındayıq. Bu bina bizim tariximizin bir növ simvoluna çevrilmişdir. Belə ki, İkinci Dünya müharibəsi zamanı Qarabaşlılar Evi, demək olar, tamamilə dağıdılmışdı və müstəqilliyin bərpasından sonra dövlətimiz kimi, bu binanı da yenidən qurmuşuq. Eynilə öz dövlətini yenidən qurmuş Azərbaycan xalqı kimi.
Bizim ölkələrimiz bir-birindən uzaqda yerləşir, lakin bizi xalqlarımız arasındakı dostluq münasibətləri birləşdirir. Xalqlarımızın tarixində son dərəcə çox bənzərliklər var. 1918-ci ildə Latviya və Azərbaycan müstəqillik yoluna qədəm qoymuş, bunun qarşısı Azərbaycanda 1920-ci ildə, Latviyada isə 20 il sonra zorakılıqla kəsilmişdir. Məhz bir çox onilliklər ötəndən sonra, xalqlarımızın davamlı olaraq ədalətə və müstəqilliyə can atması sayəsində Latviya və Azərbaycan yenidən azad olmuşdur.
Bu il bizim ölkələrimizin müstəqilliyinin bərpa olunmasının 15 ili tamam olur. Bu illər ərzində bir çox şeylərə müvəffəq olmuşuq. Latviya və Azərbaycan dünyanın siyasi xəritəsində öz yerlərini həmişəlik əldə etmişlər. Latviya 2004-cü ildə Avropa Birliyinə və NATO-ya daxil olmaq kimi özünün iki strateji məqsədinə nail olmuşdur. Azərbaycan bu 15 il ərzində yerləşdiyi regionun liderlərindən birinə çevrilmişdir. Hələ yaxın keçmişdə həyata keçirilməz görünən məsələlər, artıq bu gün reallığa çevrilmişdir.
Bu il ərzində ikitərəfli əlaqələrimizdə bir çox mühüm, həlledici məqamlar öz yerini tapmışdır. Riqada Azərbaycan səfirliyinin açılması diplomatik əlaqələrin inkişafına imkan yaratmışdır. Şadam ki, Bakıda Latviya səfirliyi öz işinə başlamışdır. Azərbaycanda fövqəladə və səlahiyyətli səfirimizin yaxın zamanda akkreditə olunacağına ümidvarıq.
İqtisadiyyat sahəsində bir çox məqsədlər yerinə yetirilmişdir. İki il ərzində ölkələrimiz arasında ticarətin həcminin faktik olaraq iki dəfə artdığını qeyd etmək istərdim. Buna ötən il imzalanmış sənədlər və həmçinin hər iki səfirliyin uğurlu fəaliyyəti imkan yaratmışdır. Paytaxtlarımız arasında birbaşa hava əlaqəsinin açılması iş adamlarının təmaslarının fəallaşmasına səbəb olmuşdur. Dövlət səfəri çərçivəsində keçiriləcək biznes forumu bu təmasların dərinləşməsi üçün əlavə imkanlar yaradır. Bu gün imzalanmış sənədlər də münasibətlərimizin inkişafına fayda verəcəkdir. Ümid edirəm ki, hökumətlərarası komissiya ilin sonuna kimi öz işinə başlayacaqdır.
Bu gün imzalanmış və bir çox mühüm beynəlxalq məsələlər üzrə bizim ümumi mövqeyimizin ifadə olunduğu birgə bəyannamə ölkələrimiz arasındakı əlaqələrin yetkinliyini sübut edir.
Mən Azərbaycan tərəfindən AB və NATO ilə daha sıx əlaqələrin yaradılmasının xeyrinə edilmiş seçimi böyük məmnuniyyətlə izləmişəm. Latviya Avropa Birliyinin Yeni qonşuluq siyasətində yaxından iştirak edir və Cənubi Qafqaz dövlətləri ilə, o cümlədən Azərbaycanla əməkdaşlığın inkişaf etdirilməsini dəstəkləyən dövlətlər sırasına aiddir. Bu, bizim prioritetlərimizdən biridir. Əmin ola bilərsiniz ki, Latviya tərəfindən bu fəaliyyət davam etdiriləcəkdir.
Cənab Prezident, mən BMT-nin baş katibi vəzifəsinə seçkilərdə namizədliyimin Azərbaycan tərəfindən dəstəkləndiyinə görə Sizə dərin minnətdarlığımı ifadə etmək istəyirəm. BMT-nin bütün dünyada sülhə, sabitliyə və inkişafa imkan yaradan əvəzedilməz forum olduğuna inanıram. Bizim ümumi borcumuz bu təşkilatın planetimizdə sülhü və tarazlaşdırılmış inkişafı möhkəmləndirərək, XXI yüzilliyin çağırışlarına səmərəli cavablar vermək iqtidarında olması istiqamətində əməyimizi əsirgəməməkdən ibarətdir.
Zati-aliləri, öz səfərinizlə Latviya xalqına verdiyiniz şərəfə görə Sizə minnətdaram. Bu, əlaqələrimizin inkişaf etdirilməsi yolunda ümidlər vəd edən bir addımdır və inanıram ki, bu əlaqələr gələcəkdə də öz inkişaf dinamikasını qoruyub saxlayacaqdır.
Mən bu badəni bizim hazırkı və gələcək əməkdaşlığımızın, ölkələrimizin tərəqqisinin şərəfinə qaldırmaq istəyirəm!
Latviya və Azərbaycan arasındakı dostluğun şərəfinə!
Bölmənin digər xəbərləri
